ناڤەندا نووچەیان – سەما
ب هەلکەفتا هاتنا جەژنا جەمایێ یا پیرۆز، جڤاتا ڕۆحانی یا بلند یا ئێزدییان، کۆمەکا رێنماییێن نوو و گرنگ بۆ زیارەتکاران دەرێخستن.
ل دووڤ ڕاگەهاندنا نڤیسینگەها جڤاتا ڕۆحانی یا بلند یا ئێزدییان، ب هەلکەفتا هاتنا جەژنا جەمایێ یا پیرۆز، میر حازم تەحسین بەگ، میرێ ئێزدییان ل کوردستان، عراقێ و جیهانێ و سەرۆکێ جڤاتا ڕۆحانی یا بلند یا ئێزدییان گەرمترین پیرۆزباهییان ڕابەری هەموو ئێزدییان ل وەلات و ژ دەرڤەیی وەلاتی دکەت.
میرێ ئێزدییان هیڤیخوازە هەموو رەڤاندییێن ئێزدی ب ساخی و سلامەتی ڤەگەڕنە ناڤ ماخێزانێن خۆ و ئاوارەیێن ئێزدی ب سەربلندی ڤەگەڕنە دەڤەرێن خۆ ل شنگالێ، و ئارامی و سەقامگیری ل دەڤەرێن مە و تەڤایا وەلاتی بەرقرار ببت.
هەر ب هەلکەفتا جەژنا جەمایێ کو ل هەفتییا بێت ڕێوڕەسمێن وێ دێ دەست پێ بکەن، کۆمەکا رێنمایان بۆ ئیسالە هاتینە دان و ب ڤی شێوێ ل خوارێ نە:
ئێک: پاراستنا پیرۆزییا پەرستگەهێ و ڕێوڕەسمێن ئۆلی ب ڕێیا ل بەر خۆکرنا جلکێن کەلەپووری یێن ئێزدییان یان جلکێن گونجای بۆ ڕێزگرتن ل پیرۆزییا پەرستگەها لالش و جەژنا جەمایێ.
دو: ئینانا بلندگۆیان (سەماعان) کو ئارامییا جهی تێکبدەن و ببنە ئەگەرێ بێزارکرنێ ل پەرستگەهێ قەدەغەیە.
سێ: ئینانا ڤەخوارنێن کەحولی ب هەموو جۆران ڤە بۆ ناڤ پەرستگەهێ قەدەغەیە، هەروەسا ب توندی ئینانا نەرگیلێ و یاریێن قومارێ و تشتێن دی ل ناڤ پەرستگەهێ قەدەغەنە.
چار: پاراستنا ئارامی و سەقامگیرییێ، ب تایبەتی ل دەمێ ئەنجامدانا ڕێوڕەسمێن ئۆلی، ژ بۆ دەستەبەرکرنا ب ڕێڤەچۆنا ڕێوڕەسمان ب باشترین شێوە.
پێنج: هەماهەنگی و هەڤکاری ل گەل دەزگەهێن (ئەمنی) ل پەرستگەهێ و تیمێن ساخلەمییێ ئهوێن شەڤ و رۆژ خزمەتێ دکەن ژ بۆ ئارامی و سلامەتییا زیارەتکاراۆ.
شەش: پاراستنا پاقژیا پەرستگەهێ و هاڤێتنا گلێشی ل جهێن تەرخانکری بۆ ڤێ چەندێ، و هەڤکاریکرنا خلمەتکاران ئهوێن ئەرکێ پاقژکرنێ دکەن د تەڤایا ڕۆژێن جەژنێ دا.
سالانە ڕێوڕەسمێن جەژنا جەمایێ ل 6ی مەها 10 دەست پێ دکەن و هەتا 13ی مەهێ بەردەوام دبن.