ناڤەندا نووچەیان – سەما
ب هەلکەفتا هاتنا جەژنا جەمایێ، ئەوا ڕێوڕەسمێن وێ یێن ئۆلی ل پەرستگەها لالش یا پیرۆز د ناڤبەرا 6 هەتا 13ی چریا ئێکێ یا 2026ێ دا ب ڕێڤە دچن، بابێشێخ، شێخ عەلی شێخ لیاس، پیرۆزباهییێ ل ئێزدییێن کوردستان، عێراقێ و هەموو جیهانێ دکەت، و هیڤییا جەژنەکا پیرۆز و پڕی خێر، ئاشتی و بەرەکەت بۆ هەموویان دخوازت.
د پەیاما بابێشێخ دا هاتییە:
ب ڤێ هەلکەفتا ئۆلی یا پیرۆز، ژ خودایێ مەزن دخوازین جەژنا جەمایێ ل سەر هەموو ئێزدییان ب خێر و خۆشی بزڤرینت، و ئێزدییان بپارێزت، و ئارامی، سەقامگیری و ئاشتی ل کوردستانێ و عێراقێ بەلاڤ ببت، و بهایێن حەز ژێکرنێ، لێبورینێ و پێکڤەژیانێ د ناڤبەرا هەموو پێکهاتەیان دا قایمتر ببن.
جەژنا جەمایێ و ڕێوڕەسمێن وێ یێن ئۆلی ل لالشێ جهەکێ ڕۆحی و ئۆلی یێ قایم د دل و دەروونێ ئێزدییان دا هەیە، و داخوازێ ل هەموویان دکەت کو پێگیرییێ ب داب ونەریت و ڕێوڕەسمێن ئۆلی یێن کەڤنار بکەن، و حرمەت و پیرۆزییا جەژنێ بپارێزن، و ئەڤ جەژن ببتە ئەگەرێ بهێزکرنا گیانێ حەزژێکرن، برایەتی و ئێکڕێزییێ دناڤ ئێزدییان دا.
داخوازێ ل هەموو ئێزدییان و زیارەتکارێن دئێنە پەرستگەها لالش یا پیرۆز د ڕۆژێن جەژنا جەمایێ دا دکەین، کو ب تەمامی پێگیرییێ ب ڕێنمایێن تایبەت ب زیارەتێ بکەن، و ڕێزێ ل پیرۆزی و حرمەتا جهێن ئۆلی بگرن، و پاقژیا پەرستگەهێ بپارێزن، و ب جلکێن ڕەسەنێن ئێزدییان پشکدارییێ د ڕێوڕەسمان دا بکەن، دا کو ب ئاوایەکێ گونجای بت ب پیرۆزیا پەرستگەها لالش و جهێ ڤێ هەلکەفتا ئۆلی.
هیڤییا جەژنەکا پیرۆز بۆ هەموو ئێزدییان دخوازین، و ژ خودایێ مەزن دخوازین ئێزدییان بپارێزت و ئێکڕێزیا وان قایم بکەت، و خێر، ئاشتی و ئارامی ل کوردستان، عێراقێ و جیهانێ بەرقرار بت.