ناڤەندا نووچەیان – سەما
پێنجشەمبی 29ێ تشرینا یەکێ 2026، مەکتەبا ڕێکخستنا پارێزگەها نەینەوا یا پارتی دیموکراتی کوردستان، د ڕاگەهاندنەکێ دا دەربارەی ڕەوشا شەنگالێ و مافێ بڕیاردانا ئێزدییان هۆشداری دا و ڕاگەهاند، تەنێ خەڵکێ شەنگالێ مافێ بڕیاردانێ د چارەنڤیسێ خۆ دا هەیە، هەروتۆ پێشنیاز دکەت ڕاپرسییەک بهێتە ئەنجامدان بۆ یەکلاییکرنا دۆخێ و ڕێزگرتنێ ژ ئیرادەیا خەڵکی.
د ڕاگەهاندنێ دا هاتییە، ماوەیەکە دەربارەی ڕەوشا شەنگالێ و چارەنڤیسێ خوشک و برایێن ئێزدی، هندەک کەس و لایەن پەیدا بووینە کو ڕێگەیێ ددەنە خۆ لێدوانێن نابەرپرسانە و بۆچوونێن نەجهێ د دژایەتیکرنا پارتیدا بەلاف بکەن.
د بەرسڤا وان لایەنان دا، مەکتەبا ڕێکخستنا پارێزگەها نەینەوا یا پارتی دیموکراتی کوردستان دیارکر، “ل ڤێرێ ئەم بۆ هەمیان دیار دکەین کو د هەمی قۆناغ و بارودۆخان دا، پارتی دیموکراتی کوردستان بەرگریکارێ سەرەکی یێ شەنگالێ و بەرژەوەندییا خوشک و برایێن ئێزدی بوویە، و ئەڤە ب ئەرکێ خۆ یێ نیشتمانی و نەتەوەیی زانییە و د وێ بەرگرییکرنێ ژی دا دێ بەردەوام بیت”.
د پەیامێ دا دوپاتکرییە ، “تەنێ خەڵکێ شەنگالێ و ئێزدی خۆ خودانێ وێ مافێ نە کو بڕیارێ د چارەنڤیس و پاشەڕۆژا خۆ دا بدەن، چو کەس و لایەنێن دی نینن ماف هەبیت ل شوینا ئێزدییان بڕیارێ د چارەنڤیسێ وان دا بدەن و ڕێکا بۆ دیار بکەن”.
زێدەتر هاتییە، ئەگەر ئەو لایەنە گەلەک خۆ ب پەرۆشێ دۆخێ شەنگالێ و ئێزدییان دزانن، با ڕاپرسییەک د ناڤ خوشک و برایێن ئێزدی دا بهێتە کرن، ئێزدی هەر بڕیارەکێ بدەن، دەبێت هەمی لایەک بەڵێنێ بدەن کو پابەند بن ب خواست و بڕیارا ئێزدییان و ڕێزێ ژ ئیرادەیا وان بگرن.
د دوماهییێ دا ئاماژە ب وێ یەکێ ژی کر کو ژبلی خەڵکێ دەڤەرێ، چو کەس و لایەنەک مافێ وێ یەکێ نینە خۆ بکەتە دەمڕاست و خودانێ چارەنڤیس و پاشەڕۆژا ئێزدییان و دەستێ خۆ د کارووبارێن وان دا وەربگریت.