ناڤه‌ندا نووچه‌يان – سه‌ما
د ڕێوڕه‌سمه‌كێ دا، 10هه‌مین سالیادا دامه‌زراندنا په‌یمانگه‌ها چاره‌سه‌ریيا ده‌روونی و تراومایێ ل زانكۆيا دهۆكێ هاته ساخ كرن، كو چاره‌سه‌رى پێشكێشى ڕزگاربوويێن ئێزدى ل وه‌لاتى و ژ ده‌رڤه دكر.
ئيرۆ ئێكشه‌مبێ، 1ـى چريا دويێ 2026، ب ئاماده‌بوونا دلشاد شه‌هاب، پەیڤدارێ سەرۆکاتییا هەرێما کوردستانێ، هه‌كار حازم ته‌حسين به‌گ، نوونه‌رێ ميرێ ئێزدييان، بابێشێخ “شێخ عه‌لى شێخ لياس”، سه‌عيد جردۆ، سه‌رۆكێ بنگه‌هێ لالش ل دهۆكێ و ئه‌ندامێن ده‌سته‌يا بلند و هه‌ژماره‌كا كه‌ساتى و به‌رپرسێن حكومى، 10هه‌مین سالیادا په‌یمانگه‌ها چاره‌سه‌ریيا ده‌روونی و تراومایێ ل زانكۆيا دهۆكێ هاته ساخ كرن.
د ڕێوره‌سمان دا دلشاد شه‌هاب، پەیڤدارێ سەرۆکاتییا هەرێما کوردستانێ په‌يڤا نێچيرڤان بارزانى، سه‌رۆكێ هه‌رێما كوردستانێ خواند و تێدا پشته‌ڤانييا خۆ بۆ هه‌موو مافێن ئێزدييان دوپاتكر.
هه‌روه‌سا چه‌ندين په‌يڤ ژ ئالييێ ئاماده‌بوويان ڤه هاتنه خواندن و برگه‌يه‌كا هونه‌رى ژ ئالييێ تيپا دهۆك ڤه هاته پێشكێشكرن.
په‌یمانگه‌ها چاره‌سه‌ریيا ده‌روونی و تراومایێ د ماوه‌يێ ئه‌ڤان سالێن بۆرى دا خزمه‌ته‌كا مه‌زن و به‌رچاڤ پێشكێشى جڤاكێ ئێزدى كرييه و ب تايبه‌ت چاره‌سه‌رييا ده‌روونى بۆ ڕزگاربوويێن ژ ده‌ستێ داعشێ ل وه‌لاتى و ژ ده‌رڤه كرييه و سێ بنگه‌هـ ل شنگالێ و كه‌مپان بۆ پێشكێشكرنا خزمه‌تێن ده‌روونى هه‌نه.
په‌یمانگه‌هـ پشتى جينۆسايدا ب سه‌رێ ئێزدييان دا هاتى ل سه‌ر ده‌ستێ تيرۆرستێن داعشێ و ب پشته‌ڤانييا حكومه‌تا ئه‌‌لمانيا ل زانكۆيا دهۆكێ هاته دامه‌زراندن و بوويه ده‌رگه‌هه‌كى رۆن ل به‌رده‌م ڕزگاربوويێن ئێزدى ژ ده‌ستێ داعشێ.