ناڤه‌ندا نووچه‌يان ــ سه‌ما
پرۆسه‌يا خواندنا زمانێ كوردی ل شنگالێ، وه‌كو هه‌موو ده‌ڤه‌رێن دی یێن هه‌رێما كوردستانێ، ده‌ستپێكرييه و ب شێوه‌يه‌كێ باش ب ڕێڤه دچت.
مەیسەر حەجی ساله‌ح، رێڤه‌به‌رێ په‌روه‌رده‌يا شنگالێ يا خواندنا زمانێ کوردی، بۆ «سه‌ما» راگه‌هاند: “د گه‌ل ده‌ستپێكرنا سالا نوو يا خواندنێ، هنه‌ك كێشه‌يا ده‌ره‌نگ گه‌هشتنا كتێبان بۆ قوتابخانه‌يان هه‌بوون، به‌لێ نوها ئه‌و كێشه ب ته‌مامى هاتییە چارەسەركرن.”
رێڤه‌به‌رێ په‌روه‌رده‌يا شنگالێ رۆنكر ژی، ئيساله حكومه‌تا هه‌رێما كوردستانێ هه‌موو كتێب بۆ په‌روه‌ردا شنگال دابينكرينه و ل سه‌ر قوتابييان هاتینه به‌لاڤكرن، و گۆت:” هه‌ر تشته‌كێ بۆ قوتابخانێن دهۆكێ بێته دابینكرن، بۆ په‌روه‌ردا شنگال ژی ئێنه دابینكرن و چ جوداهی نینه.”
مەیسەر حەجی ساله‌ح دوپاتكر، كێشه‌يا كتێبان ل هه‌موو قۆناغێن خواندنێ هاتييه چاره‌كرن و چ كێشه نه‌ماینه، قوتابی ژی به‌رده‌وامييێ ب خواندنا خوە دده‌ن.
حكوومه‌تا هه‌رێما كوردستانێ ب هه‌موو شيانان پشته‌ڤانييێ ل كه‌رتێ خواندنا كوردی ل شنگالێ دكه‌ت و هاريكارييا قوتابييان دكه‌ت.