حكومه‌ت بۆ وه‌زاره‌تێن پێشمه‌رگه و ناڤخۆ: لیستێن هێزێن ئێمناهیێ بۆ مووچه‌یێ هه‌یڤا 5 ب ناڤ ئاماده بكه‌ن
گاڤ
دیوانا سه‌رۆكاتییا حكومه‌تا هه‌رێما كوردستانێ ژ هه‌ر دو وه‌زاره‌تێن پێشمه‌رگه و ناڤخۆ خواست، لیستێن ناڤێن هێزێن ئێمناهییێ (ناڤێ سێقۆلى) بۆ مووچه‌یێ هه‌یڤا 5 ئاماده بكه‌ن و بۆ دیوانا چاڤدێرییا دارایی و وه‌زارتا دارایی یا هه‌رێمێ بهنێرن.
65 رۆژن مووچه‌یێ پێشمه‌رگه‌یی و هێزێن ئێمناهییا هه‌رێما كوردستانی ژ لایێ به‌غدایێ ڤه نه‌هاتینه هنارتن، به‌غدا دخوازیت لیستێن ناڤان بۆ بهێنه هنارتن و هه‌رێمێ بتنێ كۆد هنارتینه.
ریڤه‌به‌رێ گشتى یێ دیوانا چاڤدێرییا دارایی یا هه‌رێما كوردستانێ محه‌مه‌د زرارى ژی ئه‌ڤرۆ راگه‌هاند، بڕیاره سوبه‌هى شانده‌كێ دیوانا چاڤدێرییا دارایی یا فیدرال، سه‌ره‌دانا هه‌ولێرێ بكه‌ت و هویربینییێ لسه‌ر لیستێن هێزێن ئێمناهییا هه‌رێما كوردستانێ یێن هه‌یڤێن 4 و 5 بكه‌ن ” گۆت ژى، دبیت ناڤێن هێزێن سه‌ربازى ب لیست و یێن ئه‌منى ب كۆد بۆ به‌غدایێ بهێنه هنارتن”.
هه‌ر ئه‌ڤرۆ سه‌رۆكاتییا دیوانا جڤاتا وه‌زیرێن هه‌رێما كوردستانێ د نڤیساره‌كێ دا كو دانه‌یه‌ك ب ده‌ست گاڤ كه‌ڤتییه ژ هه‌ردو وه‌زاره‌تێن پێشمه‌رگه و ناڤخۆ خواست، ب مه‌ره‌ما ده‌سته‌به‌ركرنا شایسته‌یێن دارایی یێن كارمه‌ندێن هه‌ردو وه‌زاره‌تان و لسه‌ر بڕیارا سه‌رۆكێ حكومه‌تا هه‌رێما كوردستانێ، لیستێن مووچه‌یێ هه‌یڤا 5 ل گۆره‌ى لیستێن فه‌رمى ( ناڤێ سێقۆلى، مووچه‌یێ بنه‌ره‌تى و هه‌مى ده‌رماله و لێبرین) بۆ دیوانا چاڤدێرییا دارایی و رێڤه‌به‌رییا ژمێركارى ل وه‌زاره‌تا دارایی و ئابۆرى یێن هه‌رێما كوردستاتنێ بهێنه هنارتن.
هه‌روه‌سا خواست ژى، هه‌ماهه‌نگى و ئاسانكاریێن تمام بۆ تیمێن دیوانا چاڤدێرییا ئابۆرى یا فیدرال و دیوانا چاڤدێرییا هه‌رێمێ بهێنه كرن ل ده‌مێ هویربینى كرنێ.