ناڤه‌ندا نووچه‌يان – سه‌ما
مه‌سرور بارزانی ڕۆژا ڕۆژنامه‌گه‌رییا كوردى پيرۆزكر و پابەندبوونا حکومەتا هەرێما کوردستانێ ب ئازادییا بیروڕایێ و ئازادییا کارێ ڕاگەهاندن و ڕۆژنامەگەریێ دووپاتكر.
ل رۆژا سێ شەمبوويێ، 22-04-2025، مەسرور بارزانی، سەرۆکێ حکومەتا هەرێما کوردستانێ پەیامه‌ك ب هه‌لكه‌فتا ڕۆژا ڕۆژنامه‌گه‌رییا كوردى به‌لاڤكر.
ده‌قێ په‌یاما سه‌رۆكوه‌زيرێن هه‌رێما كوردستانێ:
د سالڤه‌گه‌ڕا ڕۆژا ڕۆژنامەگەرییا کوردی و دەرکەفتنا ژمارا ئێکێ یا ڕۆژناما (کوردستان) ژ لایێ میر میقداد میدحەت بەدرخان و سالڤەگەڕا دامەزراندنا سەندیکا ڕۆژنامەڤانێن کوردستانێ، پیرۆزباهییێ ل هەموو ڕۆژنامەڤانێن کوردستانێ دکەم و هیڤییا سەرکەڤتنێ بۆ وان دخوازم.
د ڤێ ڕۆژێدا، پابەندبوونا حکومەتا هەرێما کوردستانێ ب ئازادییا بیروڕایێ و ئازادییا کارێ ڕاگەهاندن و ڕۆژنامەگەری و ئاسایكرنا کاران بۆ کەسێن ڕاگەهاندنێ دووپات دکەین، دا بشێن ب ئاوایەکێ پیشەیی و بەرپرسیارانە و ب لبەرچاڤگرتنا یاسا و ئەخلاق و پیڤەرێن ناڤنەتەوەیی یێن ڕۆژنامەگەری و دویر ژ ناڤزراندن و بکارئینانا زمانەکێ زڤر، پەیام و کارێ ڕاگەهاندنا خۆ بجهبینن.
هیڤیدارم ڕۆژنامەڤانێن کوردستانێ، د ئاستێ مەزناهی و گرنگییا پیشەیا خۆ دا بن و ڕۆلێ خۆ یێ چالاك د هشیارکرنا جڤاکى و گەهاندنا زانیارییێن ڕاست و دروست بگێڕن و هاریکار و دەستەکێ دەسەلاتێ بن بۆ پشتەڤانییا چاکسازی و نەهێلانا خه‌له‌تى و کێماسییان.
ڕۆژا ڕۆژنامەگەرییا کوردی پیرۆز بیت و هیڤییا پێشکەفتنەکا پتر بۆ ڕۆژنامەڤانێن کوردستانێ دخوازم.
مەسرور بارزانی
سەرۆکێ حکومەتا هەرێما کوردستانێ