دبیت ئیراقییێن ژ دەرڤە هاتینە دیپۆرتکرن، بهێنە قەرەبۆکرن
گاڤ – تایبەت
رێڤەبەرییا کۆچ و کۆچبەر و بەرسڤدانا قەیرانان ل دهۆکێ داخواز ژ وان وەلاتییان دکەت یێن ژ دەرڤەی ئیراقێ دهێنە دیپۆرتکرن، فۆرمەکێ پڕبکەن و دبیت بهێنە قەرەبۆکرن.
حکومەتا ئیراقێ هەماهەنگی ل گەل ژمارەکا وەلاتێن ئەورۆپی کرییە کو ئیراقییێن داخوازا مافێ پەنابەرییێ کرین و تا نوکە مافێ ئاکنجیبوونێ وەرنەگرتی، دیپۆرت بکەنە ئیراقێ.
پیر دەیان جەعفەر، رێڤەبەرێ کۆچ و کۆچبەر و بەرسڤدانا قەیرانان ل دهۆکێ بۆ گاڤ گۆت: وان فۆرمەک بەلاڤکرییە و داخواز ژ وان وەلاتییان کرییە یێن دهێنە دیپۆرتکرن، وێ فۆرمێ پڕبکەن، ژبەر کو دبیت ئەو وەلاتی ب رەنگەکی ژ ئالییێ ئیراقێ ڤە بهێنە قەرەبۆکرن.
پیر دەیان جەعفەر هەروەسا دبێژیت: ل پارێزگەهێن ئیراقێ نڤیسینگەهـ هاتینە ڤەکرن بۆ تۆمارکرنا ناڤێن وان کەسێن دهێنە دیپۆرتکرن، لێ ژبەر کو ئەو نڤیسینگەهـ ل پارێزگەها دهۆکێ نینن، ئەو دخوازن وەلاتی ب رەنگەکێ ئۆنلاین وێ فۆرمێ پڕبکەن.