رۆلێ رێكخراوان د كێمكرنا ئێش و ئازارێن ئاواران دا
سامیە شنگالی
هەروەك ژ ناڤێ وێ دیارە رێكخراو دەزگەهەكە كو پێك دئێت ژ ژمارەكا مرۆڤان و هندەك مال و ملكیەت هەیە و ب رێیا یاسایێ دانپێدان ب كەسایەتیا ڤێ رێكخراوێ دئێتەكرن و دڤێت ڤێ رێكخراوێ هندەك ئارمانجێن ڕەوا هەبن ل گۆڕ یاسایێن نێڤ دەولەتی و یاسایێن ناڤ وی وەلاتێ رێكخراو لێ كاردكت.
ئیرۆ رۆژ ب هەزاران رێكخراو هەنە و هەر ئێك ژ وان گرنگی و پووتەپێدانێ ب هندەك لایەنێت ژیانا مە ددەت،هندەك پاراستنا شوونوارا و هندەك زانستێ و گرتی و زیندانیا و پاراستنا ژینگەهێ و گەلەك ژی هاریكاری و پاراستنا مافێ مرۆڤی،بۆ نموونە ل عێراقێ ب گشتی و ل كوردستانێ ب تایبەتی رێكخراوا رۆلەكێ گەلەك كارا دگێرن چ ئەڤ رێكخراو د حكومی بن یان نە حكومی تایبەت ئەگەر وەلات ل بارێ شەرەكی یان قەیرانەكێ بت دەولەت بتنێ نكارت پێتڤیێن ژیانا رۆژانە بۆ وەلاتیێن خۆ دابین كت،لەورا پشتی هاتنا رێكخراوا تیرۆرستی یا داعشێ رێكخراوین سڤیل رۆلەكێ گەلەك باش گێرایە د كێمكرنا ئێش وئازارێن ئاواران و تێكرنا پێتڤیێن بنەرەتی بۆ بەردەوامیدان ب ژیانێ وەك خوارن و ڤەخوارن،هەروەسا ڤەكرنا خۆلێن فێركرنێ و پێشخستنا مرۆڤی و چارەسەركرنا حالەتێن دەروونی،ئەڤ رێكخراو هاریكاربوون ب بەلاڤكرنا خیڤەتا و كەلوپەلێت مالێ و هەروەسا ڤەكرنا هێڤاریێت هۆزان خووندنێ و خۆلێت مۆزیكێ و گێرانا ئاهەنگا و ساخكرنا بیرەوەریا دا بارێ خەمێن خەلكێ سڤك كن ،ب رێیا ڤان رێكخراوا گەلەك ئەو كچ و ژنێن ژ دەستێ داعش رزگاربووین هاتنە رەوانەكرن بۆ ژ دەرڤەی وەلاتی دا چارەسەریا وان بێتەكرن ژ ئالیێ دەروونی ڤە،دیسان ڤان رێكخراوا هەتا ئاستەكێ بلند كارین برایەتیێ و یەكسانی و پێكڤەژیانێ ئاڤا بكن دناڤبەرا نەتەوە و ئایینێن جودا جودا ل كەمپا و ل ناڤ وەلاتی ژی.
ئەم چەند پەسنا ڤان رێكخراوا بكەین هێَشتا كێمە و من نەڤێت ل ڤێدەرێ ناڤی چ رێكخراوا دیاربكەم،لێ سەر رۆلێ وان ئەز گەلەك سوپاسیا وان دكەم بۆ كارێ وان یێ مرۆڤایەتی كو پتریا كادر و كارمەند و رێكخەرێن وان خۆبەخش كاردكن و ئەم ژ وان دخوازین بەردەوام بن سەر رێبازا خۆ هەتا گوند و باژێرێن هاتینە تالانكرن و وێرانكرن هاریكاربن بۆ ئاڤەدانكرنا وان.
