شه‌مۆ قاسم:پێشنيازا ڤه‌كرنا به‌شه‌كێ ئێزدياتيێ ل زانكۆيا دهۆكێ دكه‌ين
سه‌ما
ئه‌ندامه‌كێ ليژنه‌يا پێداچوونا پرۆگرامێ ئێزدياتيێ دياركر،ئيرۆ مامۆستايێن وانا ئێزدياتيێ ل قوتابخانه‌يان پێشكێش دكه‌ن پێدڤى ب شه‌هره‌زايى و زانياريێن زێده‌ترن ل سه‌ر ئاينێ ئێزديان،بۆ هندێ پتر ئێزدياتيێ بگه‌هينه قوتابيان ل پۆلا ئێكێ بنه‌ره‌تى هه‌تا دوازێ ئاماده‌يى.
شه‌مۆ قاسم، ئێك ژ ئه‌ندامێن ليژنه‌يا پێداچوونا پرۆگرامێ ئێزدياتيێ ل بنگه‌هێ لالش بۆ(سه‌ما)دبێژت: ل سالا 2023جاره‌كا دى بريار هاته دان پێداچوون ل سه‌ر هه‌موو پرۆگرامێن ئێزدياتيێ هه‌ر ژ پۆلا ئێكێ هه‌تا دوازدێ ئاماده‌يى بێته كرن و هه‌مواركرن و نۆكه كار ل سه‌ر پێداچوونا بابه‌تان يێ دئێته كرن و ل هه‌ر قوتابخانه‌كا پترژ 25% ئێزدی بن په‌رتووكا ئێزدیاتیێ دئێته خووندن و ل هه‌ر دو قۆناغێن بنه‌ره‌ت و ئاماده‌یی هه‌تا ڤێگاڤێ یا به‌رده‌وامه.
ده‌رباره‌ى چاوانيا گۆتنا بابه‌تێ ئێزدياتيێ ل قوتابخانه‌يان ژلايێ مامۆستايان ڤه،شه‌مۆ قاسم خوياكر؛باشترين رێك ئه‌وه مامۆستايێ وانا ئێزدياتيێ بۆ قوتابيان دبێژت خۆ باش به‌رهه‌ڤ بكه‌ت به‌رى بچته دوانه‌يێ ڤه ئه‌و ژى هنده‌ك په‌رتوكان ل دۆر ئێزدياتيێ بخوونت و لێگه‌ريانێ ل مالپه‌ران بكه‌ت داكو پتر زانياريان بده‌ستڤه‌بينت و ب شێوه‌يه‌كى باشتر بابه‌تى بگه‌هينته قوتابيان،هه‌روه‌سا شێوازه‌كێ نوو مه ئێخستيه دپرۆگرامى دا ئه‌وه ل هه‌ر وانه‌يه‌كا ئێزدياتيێ دا 10 خۆله‌ك بێنه ته‌رخانكرن دناڤبه‌را قوتابى و مامۆستايى دا بۆ پرسياران و گه‌نگه‌شێ داكو قوتابى ژى پشكداربن.
ئه‌ندامێ ليژنه‌يا پێداچوونا پرۆگرامێ ئاماژه ب وێ چه‌ندێ دا مامۆستايێن بابه‌تێ ئێزدياتێ پێشكێش دكه‌ن پێدڤى زانياريانه و يا گرنگه مه پسپۆرێن وارێ ئێزدياتيێ هه‌بان و پێشنيازا ڤه‌كرنا به‌شه‌كى يان په‌يمانگه‌هه‌كا پێزانينێن ئێزدياتيێ سه‌ر ب زانكۆيا دهۆكێ يان هه‌ر زانكۆيه‌كا دى بت دكه‌ين تايبه‌ت بۆ ده‌رچوونا هنده‌ك مامۆستايێن تايبه‌تمه‌ند و شه‌هره‌زايه‌كا باش دئێزدياتيێ دا هه‌بت.
شه‌مۆ قاسم ئه‌و يه‌ك ژى دياركر؛ بريارا ده‌ستنيشانكرنا مامۆستايێن بابه‌تێ ئێزدياتيێ ژلايێ رێڤه‌به‌رێن قوتابخان بخۆ ژى دڤێت هه‌لبژار‌تنه‌كا سه‌ركه‌فتى بت، ژى مه پێ باش بوو په‌روه‌رده ل بێنڤه‌دانا وه‌رزێ هاڤينێ دا خۆلان بۆ مامۆستايێن وانا ئێزدياتيێ ڤه‌كه‌ت،بۆ هندێ بۆ سالا نوو يا خووندنێ پتر خۆ به‌رهه‌ڤ بكه‌ن.