كچەكا رزگاربووی:داعش كرین و فرۆتن ب كچێن ئێزدیان دكر
سەما/جەمال كودی
كچەكا كوردا ئێزدی ب ناڤێ (ل،س)پشتی ژ دەستێن تیرۆرستێن داعش رزگاربووی ئاشكەراكر،كو رۆژانە كرین و فرۆتن ب كچێن ئێزدیان دهاتە كرن.
(ل ،س) كچەكا رزگاربوویا ئێزدی یا تەمەن بیست سالی بۆ (سەما) دیاركر؛دەمێ مە زانی تیرۆرستێن داعش یێن دئێنە دناڤ ئاخا مە دە وزۆریێ ل كچ وژنا دكەن وزارۆكا دكوژن،ئەم ژگوندێ حاتمیێ دەركەفتین وبەرەف شنگالێ چۆین ، مە دیت خەلك یێ ژشنگالێ ژی دەردكەڤت وبەرەف چیای ڤە دچت،لێ بەری ئەم خۆ قورتال بكەین ك وان ئەم دەستە سەركرین وئەم نێزیكی هەزار كەسا بووین ، ل دەستپێكێ كچ وژن وزەلام وزارۆك هەموو ژێك جودا كرن وهەرهندەك برنە جیەكی ،پشتی ئەم هۆسا ژێك ڤەقەتاندین من كەس ژ خێزانا خۆ نەدیتە ڤە ، پاشی ئەم ژشنگال ڤەگوهاستینە تەللەعفەر وتیلەفونێت مە ژمە ستاندن وئەم دقوتابخانەكێ كرین وگۆتنە مە دڤێت هوون هەموو موسلمان بن وهەرئێكە نەرازی با ب توندی دهاتە قوتان وئەشكەنجە دان ، پاشی ئەم برینە بادۆش وژبادۆش ئەم ڤەگوهاستینە مووسل وپاشی ئەم برینە بەعاج.
ڤی كچێ گۆت ژی:رۆژانە هندەك ژناڤ مە دبرن وهندەك دئینان وكڕین وفرۆتن بمە دهاتە كرن،هەتا رۆژەكی دەمێ ئەم زڤراندینە تەللەعفەر ئەز هاتمە فرۆتن بۆ كەسەكی سووری وئێكسەر ڤەگوهاستمە باژێرێ رەققە ل سوریا ،بەلێ ئەز گەلەك ل وێدەر نەمام ددەمەكی دە ئەز ژنك وی یێ سووری رەڤیم ومن خۆ گەهاندە مالەكا كورد و وێ مالێ ژی ئەز برمە مالەكا دی ومن ژمارا تێلەفونا مامێ خۆ دایێ وئەوان تێلەفونا مامێ من كر ل عیراقێ و گۆتێ ئەڤە كیژا وە گەهشتە نك مە.
ئەو چەندە ژی ئاشكەراكر:پاشی ئەز چومە توركیا نك خالێ خۆ و ژتوركیا هاتمە دهۆكێ و ل ناڤا كەسوكارێن خۆ ژیانا خۆ برە سەری.