ناڤەندا نووچەیان – سەما
ئه‌ندامه‌كێ فراكسیۆنا پارتی ل په‌رله‌مانێ عیراقێ راگه‌هاند، ل سه‌ر نه‌جێبه‌جێكرنا رێككه‌فتنا شنگالێ ل دادگه‌ها فیدراڵى دێ سكاڵايێ تۆمار كه‌ین
مه‌حما خه‌لیل، ئه‌ندامێ فراكسیۆنا پارتی ل په‌رله‌مانێ عیراقێ ب ماڵپه‌را فه‌رمی یێ پارتی دیموكراتی كوردستان راگه‌هاند: پشتی چه‌ندین سالان ژ ئیمزاكرنا رێككه‌فتنا شنگالێ هێشتا به‌ندێن د ناڤ رێككه‌فتنێ دا نه‌هاتینه جێبه‌جێكرن و ره‌وشا شنگالێ نه‌هاتیه ئاساییكرن، ئه‌ڤه د ده‌مه‌كی دا كو ئێك ژ خالێن كارناما حكومه‌تا نوكه یا عیراقێ ئاساییكرنا ره‌وشا شنگالێ یه.
ئه‌و په‌رله‌مانتارێ عيراقێ دبێژت: “د چه‌ند رۆژێن بوری دا پرسیارا ئاساییكرنا ره‌وشا شنگالێ ژ وه‌زیرێ ناڤخۆیێ عیراقێ كر، وی به‌رسڤ دا “په‌كه‌كه رێگره ل به‌ر ئاساییكرنا ره‌وشا شنگالێ و ئاسته‌نگان ل به‌ر رێككه‌فتنا شنگالێ دروست دكه‌ت”.
دبێژت: ” د چه‌ند رۆژێن داهاتی دا ل دادگه‌ها فیدراڵى دێ سكاڵايێ ل سه‌ر نه‌جێبه‌جێكرنا رێككه‌فتنا شنگالێ تۆمار كه‌ین، دڤێت ب رێیا یاسایێ لێپرسین بێته كرن و ره‌وشا شنگالێ بێته ئاساییكرن.”
ل 9ى ئوكتۆبه‌را سالا 2020ێ هه‌ولێر و به‌غدا رێككه‌فتنه‌ك بۆ ئاساییكرنا ره‌وشا شنگالێ ژ روویێن سیاسى، كارگێرى و ئه‌منى ڤه ئيمزاكر و هه‌تا نوكه چ به‌ندێن وێ نه‌هاتينه بجهئينان.