ناڤه‌ندا نووچه‌يان – سه‌ما
ره‌زامه‌ندى ل سه‌ر دروستكرنا چه‌ند پاركێن راوه‌ستاندنا ترومبێلان ل په‌رستگه‌ها لالش هاتيه دان، سه‌رپه‌رشتياره‌كێ نووژه‌نكرنا لالش دبێژت: “چاڤه‌ڕێ مه‌زاختنا بوودجه‌يێ پێدڤى دكه‌ين”.
سالانه و ب تايبه‌ت ل ده‌مێ جه‌ژن و هه‌لكه‌فتان ب هه‌زاران ئيزدى سه‌ره‌دانا په‌رستگه‌هێ دكه‌ن، ژ ئه‌گه‌رێ نه‌بوونا پاركه‌كا به‌رفره‌هـ يا راوه‌ستاندنا ترومبێلان، قه‌ره‌بالغيه‌كا زێده چێدبت و ئاسته‌نگى بۆ هاتن و چوونا وه‌لاتيان په‌يدا دبن.
ئه‌ندازيار خالد نه‌رمۆ، ئێك ژ سه‌رپه‌رشتيارێن نووژه‌نكرنا په‌رستگه‌ها لالش بۆ سه‌ما دياركر، پارێزگه‌ها نه‌ينه‌وا ره‌زامه‌ندى دايه بۆ دروستكرنا پاركه‌كا پێنج تا شه‌ش نهۆمى ل په‌رستگه‌ها لالش و تنێ مايه به‌لێنده‌ر وه‌ربگرت و ده‌ست بكارى بكه‌ت ئه‌گه‌ر بوودجه‌يێ پێدڤى هاته ته‌رخانكرن.
سه‌رپه‌رشتيارێ نووژه‌نكرنا په‌رستگه‌ها لالش دبێژت: ژبلى ڤێ پاركى پێشنيارا دروستكرنا دو پاركێن دى ژى پێشكێشى ئه‌نجومه‌نێ وه‌زيرێن عيراقێ كريه و هێشتا به‌رسڤ ل سه‌ر نه‌دايه.
خالد نه‌رمۆ ئاشكراكر: “حكومه‌تا هه‌رێما كوردستانێ گرنگييه‌كا تايبه‌ت ب په‌رستگه‌هێ دده‌ت، لێ مافێ ئێزديان دحكومه‌تا عيراقێ دا ژى هه‌يه وه‌كو هه‌موو پێكهاته و ئايينێن دى بوودجه بۆ وان بێته ته‌رخانكرن چ ل لالشێ يا نل ده‌ڤه‌رێن دى يێن ئێزديان”.
نوكه حكومه‌تا هه‌رێما كوردستانێ ده‌ست ب پرۆژێ جووتسايدێ ڕێيا شێخان بۆ په‌رستگه‌ها لالش كريه و قۆناغێن باش يێن كارى ده‌ربازكرينه و پشكه‌ك ژ سايدێ ئێكێ هاتيه قێركرن و ڤه‌كرن ل هه‌مبه‌ر خه‌ڵكێ ده‌مێ دچنه لالشێ. ب ته‌مامبوونا ڤى پرۆژه‌يى ئێدى ئاسته‌نگێن هاتن و چوونێ ل سه‌ر ڕێيا سه‌ره‌كى يا چوونا لالشێ نامينن.
ب پشته‌ڤانيا حكومه‌تا هه‌رێما كوردستانێ و چه‌ند لايه‌نێن دى، ماوێ چه‌ندين سالانه ده‌ست ب نووژه‌نكرنا په‌رستگه‌ها لالش هاتيه كرن و تا نوكه ب چه‌ند قۆناغا كار ل سه‌ر به‌رده‌وامه.
پەرستگەها لالش، تاكه جيێ هەرە پیرۆزە ژبۆ جڤاكا ئێزدیان ل سەرانسەرێ جیهانێ. دكه‌فته قه‌زا شێخان ل پارێزگەها دهۆکێ.
لالش نە تنێ جهێ پەرستنێیە، بەلکو ناڤەندا سەرەکی یا ئۆلا ئێزدیانه و دبتە ئارمانجا گەشتێن ئۆلی ژ ئالیێ هەموو ئێزدیان ڤە ل جیهانێ.