پێشمەرگه‌يه‌كێ ئێزدى:شەش سالان ژ خێزان و كەس و كارێن خوە دویركەفتم
ئه‌ڤرۆ نيوز:
ئێك ژ پێشمەرگێن شۆرەشا گولانێ بناڤێ (وەلاتی رەشو حسێن حەسەن) ژ دایك بوویێ سالا 1965ێ یە ل قەزا شنگال، ل سالا 1973ێ ژ شنگال بۆ باژێرێ زاخۆ ژ لایێ حوكمەتا ئیراقێ یا وی سەر دەمی ڤە هاتینە دەرئێخستن، و ماینە ل زاخۆ هەتا سالا 1975ێ و دووڤدا هاتینە ڤەگوهاستن بۆ ناحیا باعەدرێ، و هەتا نوكە ل وێرێ ئاكنجی نە.
پێشمەرگێن شۆرەشا گولانێ وەلاتی رەشو حسێن حەسەن، د دیدارەكێ دا ل گەل رۆژناما ئەڤرۆ ئاشكراكر، كو پشتی نەسكویا سالا 1975ێ خودێ ژێ رازی خەیری بەگێ داخوازكر، بنەمالێن مە بهێنە ڤەگوهاستن بۆ ناحیا باعەدرێ وی دەمی ئەم پتر ژ 100 مالان بووین، وی دەمی بابێ منێ رێكخستی بوو، ئانكو هێشتا ل شنگال بەلێ نە پێشمەرگە بوو، ل گەل هاتنا مە بۆ باعەدێ و دەسپێكا شەرێ ئیراق و ئیرانێ ل سالا 1982ێ هاتمە رێكخستن دناڤا رێزێن پارتی دیموكراتی كوردستان دا، ل گەل (نەمری مەعری و جردو خەلەف حسێن) هاتمە رێكخستن و هەر بەلاڤووكەكا هاتبا مە بەلاڤەدكر، و هەمان دەم هەر پێزانیەكا هەبا گرێدایی كارێ پارتایەتی با مە دگەهاندە حزبێ، ل سالا 1984ێ گەلەك دیفچوون و چاڤدێری ل سەر مە گەنجان هەبوو و ئەم گەلەك ترسیاین بهێنە ئاشكراكرن لەوما مە پەیوەندی ب شۆرەشا گولانێ كر و مە چەكێ شەرەفێ هەلگرت و من و برازیەكێ خوە ب ئێك رۆژ پەیوەندی ب پێشمەرگەی كر و چوومە چیایی و هەتا گەهشتیمە بارەگایێ لژنا ناوچا شێخان وی دەمی لژنە ل سێدەرا بوو و دووڤدا بۆ بارەگایێ لقێ ئێك هاتینە رەوانەكرن وی دەمی هەر كەسەكێ گەهشتبا شۆرەشێ دڤیابا چووبا بارەگایێ لقێ ئێك یێ پارتی دیموكراتی كوردستان و پشتی بورینا چار پێنچ هەیڤان جارەكا دی ڤەگەریاینە لژنا ناوچا شێخان و هاتینە ناڤ رێكخراوا شەهید(مەحمود ئێزدی)، و مە بەردەوامی دا خەباتێ و هەلگرتنا چەكێ شەرەفێ دژی داگیركەرێن كوردستانێ هەتا سالا 1988ێ .
هەمان پێشمەرگە گۆت: ل سالا 1986ێ رژێما وی سەردەمی دایكێن مە كرنە قەلابا دا و ئینانا دەڤەرا (هەسنەكا) و نەهێلا بهێنە خوارێ بەلكو وەك خیزی و بلوكا خالیكرن و گۆتێ هەرن بگەهنە عەیالێن خوە و دەستێ خوە دانانا سەر مال و ملكێ مە ل باعەدرێ، سەرا من دو سالان خویشكا من هاتە زیندانكرن و كورەكێ من دو سالان و برایەكێ من سالەكێ سەرامن هاتنە زیندانكرن و ماوێ چار بۆ پێنچ سالان من زارۆك و دایك و خێزانا خوە نەدیتن چونكە ئەم دناڤا پێشمەرگەی دا بووین و ئەم نەدشیاین بهێنە دەڤەرێ و بتنێ مە ب دێربینا سەحكرە مال و هەڤال و كەس و كارێن خوە وی دەمی ژ بەر دارودەستێن رژێمێ بهێنە دناڤا خێزانێن خوە دا و ئەڤرۆ ئەو كەس بووینە بەرپرسێن مە.
هەمان پێشمەرگە گۆت: وی هەمی ئەندامێ، مالا مە نەدشیان ل مالێن خوە بنڤن و هەر دەم دیفچوون ل سەر هەمی ئەندامێن مالا مە هەبوون وی دەمی مە چ مووچە ژی نەبوون و مخابن هەتا نوكە چ بوومە نەهاتیەكرن و هەتا نوكە برایێ من ژی یێ بێ مووچە یە و باوەركە جارەكێ هەر ئەوێن نێزیكی مە ئەمن و هەوالگێریا بەعسیا ئینا سەر برایێ مە و برایێ من خوە دناڤا لنگێن چیلێ دا ڤەشارت و گەلەك لێگەریان و نەدیت و شەڤەكێ ب دروستی برایێ من نەشیا ل مال بنڤیت.
پێشمەرگێ شۆرەشا گولانێ وەولاتی گۆت: ل سالا 1988 دەمێ لەشكرێ ئیراقێ ل گەل هێزێن چەكدار هێرشی شێخان كری و 14 رۆژا ب شەڤ و رۆژ ل سەر مە شەر بوو و خەلكێ دەڤەرێ هەمی دیدەڤانن و خێزان و ژن و زارۆك ژ دەڤەرێ دەركەفتن و مە شەرێ خوە بەردەوامی دایێ هەتا بوومە بروسكەك ژ مەكتەبا سیاسی نەهاتی و گۆتی خوە ڤەكێشن مە خوە نەڤەكێشا وی دەمی گەلەك دنیا یا ساربوو و مە ئاگر دهەلكر و مە سینگێ خوە دایێ و پشتا مە دبوو جەمەد و ئەگەر مە پشتا خوە دابایێ پشتا مە گەرم دبوو و سینگێ مە ساردبوو و دبوو جەمەد و ئەڤە ژ وێ رۆژێ وەرە هەتا نوكە قركا من یا نەخوش و دەنگێ من گەلەك بزحمەت دەردكەڤیت و دیسا هەڤالەكێ من كەفتە دەستێن رژێمێ و پشتی ماوەكی ئێكسەر سێدارەدان .
وەلاتی ئەو ژی گۆت: گەلەك شەران پشكدار بوویمە وەك شەرێن (سەرێ زاویتە، قوت مەلكو، دێرەلوكێ) شەرێ دێرەلوكێ گەلەكێ نەخوش بوو و بەفرۆ و باران بوو و نەهی شەڤێ ل سەر سەرێ مە شەر بوو هەتا رۆژا دی بێ خوارن و ڤەخوارن و شەر نەهاتە راوستاندن و نەبتنێ ڤی شەری و گەلەك جاران هەتا سێ شەڤ و سێ رۆژان مە خوارن نەخواریە.
هەمان پێشمەرگە گۆت: ل هەوا ئەنفالان ل سالا 1988ێ ئەم چووینە توركیا و ل كەمپا موشێ ماوێ سالەكێ مام و دووڤ دا چوومە ئیرانێ و پشتی بورینا سالەكێ ل سالا 1990 ل گەل د.كەمال كەركووكی كو وی دەمی بەرپرسێ لقێ ئێك بوو یا پارتی دیموكراتی كوردستان ئەم ڤەگەریاینە كوردستانێ وی دەمی پێشمەرگاتی گەلەك یا نەخوش بوو چونكە پشتی هەوا ئەنفالان بوو و حوكمەتا بەعس چ گوند و مال ل كوردستانێ نەهێلا بوو و هەمی راكربوون و دیسا سەقایێ دنیایێ ژی گەلەك یێ تەزی بوو و نەیێ هاریكار بوو و خوارن ب چ رەنگان نەبوو و گەلەك یا كێم بوو و زێدەتر پشت بەستنا مە ل سەر خوارنا فێقی بوو دناڤا چەم و رەزان دا و فێقی ژی مرۆڤ نەشێت خوە پێ بگریت و ب رێكا رێكخستیێن خوە هێدی هێدی ئەەم ماین و هەتا رژێما بەعس چووی وەلاتێ كوێتێ داگیر كری و دەمێ سەرهلدانێ دەست پێكری ئەم وێ شەڤێ دناڤا باژێرێ دهۆكێ دا بووین و مە پشكداری دئازادكرنا باژێرێ خوە دا كر وی دەمی گەلەك كەیفا من هات چونكە ل سالا 1984ێ من خێزانا خوە نەدیت بوو هەتا 1990 و گەلەك دلخوش بووین بدیتنا كەل و كارو مرۆڤێن خوە شاد بووینە ڤە و هاتنە ناف مال و كەس و كارێن خوە دا .
هەمان پێشمەرگە گۆت: پێشمەرگاتیا وی دەمی یا بێ مووچە بوو بەلێ گەلەك یا خوش بوو وی دەمی دادپەروەری هەبوو و مافێ مرۆڤی نەهاتە بەرزەكرن و پێشمەرگە و بەرپرسێ خوە وەك ئێك بوون و ئێك خوارن دخوار و فەرق و جوداهی نەبوو نەگۆتن ئەڤە ئێزدی یان موسلمانە و هەمان دەم نوكە مووچە هەیە بەلێ باوەربكە پێشمەرگاتیا وی دەمی گەلەك ژ یا نوكە خوشتر بوو و خەلكی زێدەتر قەدر و قیمەت دامە ئێزدی یان ژ موسلمان و ئەڤە راستی یە و دەمی مە سەرەدانا مالەكێ كربا و زانیبا ئەم پێشمەرگەینە و ئێزدی نە گەلەك قەدرێ مە دگرت و ئەم سوپاسیا هەمی ئەوان مالان دكەین بۆ ئەڤی كارێ نشتیمان پەروەرانە.
هەمان پێشمەرگە گۆت: نوكە هەر بەرپرسەكێ تشتەك بدەست كەفت بتنێ بخوە و مالا خوە دكەت و دبینم ئەڤە زیانێ دگەهیتنە حزبێ و ل كەسەكی ناكەت و ئەگەر بەرپرسێ دادپەروەر بیت دێ زێدەتر خەلك گوهداری یا وی كەت و دێ گەهیتێ، پەیڤا من یا دووماهیێ ئەوە رێز ل پێشمەرگەی بهێتەگرتن، و مالێن ماندیبوون دیتی مافێن وا نەهێتەخوارن و قەدر و قیمەتێ خێزانێن شەهید و بریندار و زیندانیێن سیاسی بهێتە گرتن.