ڕزگاربوویەك:داعش كارێن نه مرۆڤایەتی ل دژى ئێزديان ئەنجامدان
سه‌ما:
كچەكا رزگاربوویا ئێزدی ژ دەستێن داعش دیاركر،دەما كەفتینە دناڤ دەستێن تیرۆرستێن داعش دا ئازار و ئەشكەنجەداین و كارێن دژی مرۆڤایەتیێ لگەل كچ و ژنێن ئێزدی ئەنجام دان،داخواز دكەم هەموو گرتیێن ماین بێنە رزگاركرن.
فایزا كەمال،ئێك ژ رزگاربوویێن دەستێن تیرۆرستێن داعش بۆ تۆڕا لالش دیاركر،دەما تیرۆرستێن داعش هێرشی شنگال كری تەمەن یازدە سالی بووم كەفتیمە دناڤا دەستێ هۆڤێن داعشێ دا و پێنچ سال و دوو هەیڤان ئێخسركری بووم و ئازار و ئەشكەنجەداین و هەموو كارێن ل دژی مرۆڤایەتیێ د دەرهەقێ مە دا هاتنەكرن،هێشتا ب هەزاران كچ و ژنێن ئێزدی د دەستێ دوژمنان دا ماینە،لەوا داخوازا دكەین یاسا ب شێوەیەكی دادپەروەرانە بێتە بجهـئینان و هەموو گرتیێن ماین بێنە رزگاركرن و بتر هاریكاری و پشتەڤانیا رزگاربوویان بێتەكرن،چنكو درەوش و ژیانەكا نەخۆش دا ژیاینە و هەموو جۆرێن نەخۆشیان دیتینە.
فایزایێ گۆت:ل رێككەفتی(25/9/2019)ێ ژ دەستێن تیرۆرستێن داعش هاتمە رزگاركرن و ڤەگەریامە ناڤ كەسوكارێن خۆدا،دەمێ رزگاربوویم مالبات و مللەتێ مە پێشوازیەكا گەرم ل وێ كرن و هل هلاندن و شریناهی بەلاڤكرن و گەلەك كەیفخۆشیا خۆ دیاركرن،هەروەسا گەلەك كەیفخۆش بووم بۆ وێ هاریكاری و پشتەڤانیا مللەت و كەسوكارێن خۆ پێشكێشێ وێ كرین.
هەروەسا دیاركر، ئێش و ئازار و نەخۆشێن لژێردەستێ داعش دیتین و هەموو زۆلم و زۆرداریا بسەرێ ئێزدیان دا هاتی دگەل كۆمەكا داخوازیان ژوان ژی هاریكاریا رزگاربوویان بێتەكرن دناڤا بەرپەرێن پەرتۆكەكێ دا لژێرناڤێ(وردە بیچا‌و فی غابە سودا‌و) ژلایێ نڤیسەر حسێن باعەدری ڤە هاتینە نڤیسین،ئەڤ پەرتۆك هاتیە چاپكرن و د قۆناغا بەلاڤكرنێ دایە.
دووپاتكر ژی پەیاما وێ بۆ رزگاربوویان ئەوە ژ چ كەسان نەترسن و ئێش و ئازار و نەخۆشی و زولم و زۆرداریا تیرۆرستێن داعش بسەرێ كچ و ژنێن ئێزدی ئینایی بكەنە پەرتۆك و بۆ جیهانێ بێژن و داخوازا مافێ خۆ بكن،كو بۆ دوژمنی بدەنە دیاركرن ئەو بهێزن و چ جاران ژ ئەوان ناترسن و كچێن مللەتەكێ خۆراگرن.