هژمارەكا مەزن ژ ئێزدیێن رۆژئاڤا كوردستان بجهێلایە و چووینە ئەوروپا
سه‌ما:
«نوكە ئێزدی ل عەفرینێ د خراپترین رەوش دانە، گەلەك مەزارگەه و جهێن ئاینی ئێزدیان هاتینە خرابكرن، گەلەك كەسێن ئێزدی هاتینە بێ سەروشینكرن، هەتا گرۆپێن رادیكال ئێزدیان رەڤینن ب پارە ئازاد دكەن، ئێزدی ل عەفرینێ تووشی جینۆسایدێ بووینە، كەسێ ئاگەه ژ خرابیا رەوشا ئێزدیان ل سوریا ب تایبەتی ژی ل باژێرێ عەفرینێ نینە».
شاهین حەنان، نوونەرێ ئێزدیێن رۆژئاڤا بەحسێ خرابیا رەوشا ئێزدیان ل وەلاتی سوریا ب تایبەتی عەفرینێ دكەت و بۆ ئه‌ڤرۆ نيوز دبێژیت: هژمارەكا زۆر ژ ئێزدیان رۆژئاڤا، كوردستانێ بجه هێلاینە و چووینە دەولەتێن ئوروپی، كەس نەشێت ل عەفرینێ بێژیت ئەز ئێزدی مە و 150 خێزانێن ئێزدی یێن رۆژئاڤایێ كوردستانێ نوكە ل هەرێما كوردستانێ ئاكنجیكرینە».
شاهین حەنان، نوونەرێ ئێزدیێن سوریا ل پارێزگەها دهۆكێ راگەهاند: «ل سالا 2018ێ ژ ئەگەرێ شەرێ عەفرینێ، ئێزدی دەربەردەربوون، د ئەنجامدا عەرەب هاتینە سەر مال و مولكێن ئێزدیان، ل سوریا هژمارەكا زۆر ژ ئێزدیان چووینە دەولەتێن ئوروپی و نەشیان ل سەر مال و حالێ خۆ ل رۆژئاڤایێ كوردستانێ بژین، گەلەك كارتێكرن ل سەر رەوشا ئێزدیان چێبوویە، هەتا ئێزدی نەشێن زارۆیێن خۆ رەوانەی قوتابخانەیان بكەن، ژبەركو نوكە ل سوریا ب تایبەتی ژی باژێرێ عەفرینێ ئاینی ئێزدیان دهێتە گوهارتن و خەلك دهێنە نەچاركرن دەستان ژ ئێزدیاتیێ بەرەن».
ئاماژە دا وێ چەندێ ژی: «نوكە ئێزدی ل عەفرینێ د خراپترین رەوش دانە، گەلەك مەزارگەه و جهێن ئاینی ئێزدیان هاتینە خرابكرن، گەلەك كەسێن ئێزدی هاتینە بێ سەروشینكرن، هەتا گرۆپێن رادیكال ئێزدیان رەڤینن ب پارە ئازاد دكەن، ئێزدی ل عەفرینێ تووشی جینۆسایدێ بووینە، كەسێ ئاگەه ژ خرابیا رەوشا ئێزدیان ل سوریا ب تایبەتی ژی ل باژێرێ عەفرینێ نینە».
نوونەرێ ئێزدیێن سوریا ل پارێزگەها دهۆكێ گۆت ژی:» 150 خێزانێن ئێزدی یێن سوریا ئاوارەیێ هەرێما كوردستانێ بووینە، ژ وانا ژی پتر ژ 35 پتر ژ 35 خێزانێن ئێزدیێن سوریا ل دهۆكێ هاتینە ئاكنجیكرن، یێن دیتر ل هەولێر ئاكنجیكرینە و ب هیچ شێوەیەكێ ئەم نەشێین ڤەگەرینە عەفرینێ، ژبەر كو هەر كەسەكێ ڤەگەریت دێ تووشی جینوسایدی بیت، یان پێدڤیە ئاینێ خۆ بگهۆریت یان دهێتە كوشتن».
شاهێن حەنان، خویا كر:» ئێزدی ل سوریا ب تایبەتی ژی ل عەفرینێ بەرەڤ نەمانێ دچن، هەتا نوكە دەمێ كەسەكێ ئێزدی گیانی خۆ ژ دەست بدەت كەس و كارێن وێ نەشێن ببەنە عەفرینێ ڤەشێرن ژ ناچاری ل قەزا شێخان مریێن خۆ ڤەدشێرن، كەس پرسیارا رەوشا ئێزدیێن سوریا ناكەت، نوكە مە ل بەرە رۆژەكێ بچینە بارەگایێ نەتەوەیێن ئێكگرتی ل هەولێر داخوازا مافێن خۆ بكەین، ژبەركو ئێزدیاتیی ل عەفرینێ د مەترسیەكا مەزن دایە».
زێدەتر گۆت: «ل عەفرینێ كەس نەشێت بێژیت ئەز ئێزدی مە، ئێزدی نەشێن خۆ دیاربكەن، 23 گوندێن ئێزدیان ل عەفرینێ هەبوون و نوكە پرانیا وان چوولكرینە و عەرەب تێدا هاتینە ئاكنجیكرن، گەلەك تەعریب ل سەر دەڤەرێن ئێزدیان چێبوویە و هەتا عەرەب ئەردێ چاندنێ یێن ئێزدیان دچینن ئێزدی نەشێن كار بكەن».