کاریگەریا سۆشيال ميديايێ ل سەر پەیوەندیێن جڤاكی
سه‌لام خالد
دگەل پێشکەفتنا بەردەوام يا تەکنۆلۆژیایێ یا بلەز ، ئامرازێن تۆرێن جڤاکی بووینە ئامرازێن سەرەکی یێن پەیوەندی کرنێ د ژیانا مرۆڤی دا و ب تایبەت د ژیانا گەنجان دا. ڤێ شۆرەشا تەکنۆلۆژی رێکێن پەیوەندی کرنێ د ناڤ هەموو مرۆڤان دا ل جهێن جیاواز و ژ کەلتورێن جیاواز دا دروستکریە، کو جیهان وەکی گوندەکی بچووک لێ کریە. ڤێ پێشکەفتنێ دەرفەتەکا باش یا بۆ مرۆڤان و ب تایبەت گەنجان رەخساندی کو پەیوەندیێ د گەل کەسێن بیانی دورستبکەن و کەلتور و داب و نەریتێن خوە ب مللەتێن دی بدەن ناسکرن و د هەمان دام دا کەلتور و داب و نەریتێن مللەتێن دی ناسبکەن. بەلێ دڤێت ژ بیرنەکەین کو ڤێ پێشکەفتنێ کاریگەریێن خوە یێن ئەرێنی و نەرێنی یێن هەین لسەر گەنجان و ژیانا وان یا راستەقینە.
ئێک ژ وان کاریگەریێن ئەرێنی یێن تۆرێن جڤاکی لسەر پەیوەندیێن جڤاکی دناڤ گەنجان دا ، بەرفرەهکرنا بازنێ پەیوەندیانە د گەل کەسێن نوی د ناڤ ژینگەها خوە دا و ژ ژینگەهـ و جهـ و کەلتورێن جیاوازدا دورستبکەت، هەروەسا ئەڤ پێنگاڤە شارەزایەکا باش ل جەم وان گەنجان دورست دکەت و پەیوەندیێن وان دەولەمەند دکەت لسەر ئاستێ شەخسی و کەمەلایەتی.
دهەمان دەم دا ڤێ چەندێ کاریگەریا خۆ یا نەرێنی یا هەی لسەر گەنجان، چونکە ئەگەر گەنج پتریا دەمێن خوە د ناف تۆرێن جڤاکی دا ببۆرینیت، دێ گاریگەریەکا نەرێنی لسەر ژیان و پەیوەندیێن وان یێن جیهانا راستەقینە کەت، و شیانێت وان لاواز کەت د دروستکرنا پەیوەندیێن ساخلەم د جیهانا راستەقینە دا ل گەل هەڤال ، دۆست ، مالبات و دەوروبەران…
بێ گۆمان پشکەک ژ گەنجان، ژ ئەنجامێ هندەک پەیوەندیێن سۆزداری یێن نە دروست و نەسەرکەفتی، خۆ ژ پەیوەندیێن جڤاکی د ژیانا حەقیقی دا دوردکەن و وێ بۆشایێ ب رێکا پەیوەندیێن د ناف تۆرێن جڤاکی دا پڕ دکەن و پەیوەندیێن دەمکی دروست دکەن.
بۆ روبەرووبونا ڤان ئاستەنگان، پێدڤیە گەنج یێ هۆشیاربیت لسەر کاریگەریا ئامرازێن تۆرێن جڤاکی لسەر پەیوەندیێن جڤاکی و بشێوەیەکی بکاریت هاوسەنگیێ د ناڤبەرا پەیوەندیا دناڤ تۆرێن جڤاکی و پەیوەندیێن جڤاکی د ژیانا راستەقینەدا دورست بکەت. پێدڤیە گەنج وی دەم و شیانێن خۆ بۆ دورستکرنا پەیوەندیێن جڤاکی د ژیانا راستەقینەدا بکاربینیت و پشکداریێ د چالاکی و خولێن جیاواز دا بکەت.
هەروەسا پێدڤیە گەنج یێ هۆشیاربیت لسەر وان زانیاری و پەیوەندیێن لسەر تۆرێن جڤاکی دهێنە دورستکرن و شیانێت هەلسەنگاندنێ یێ بهێزهەبن، لسەر وان کەسێن دهێنە ناسکرن د وێ جیهانا ئەلیکترۆنی دا .
ئامرازێن تۆرێن جڤاکی کاریگەریەکا مەزن لسەر پەیوەندیێن جڤاکی یێن گەنجان دکەت، و بازنێ پەیوەندیێن وان بەرفرەهـ دکەت و دەرفەتەکا باشە ژ بۆ ناسکرنا کەسێن نوی ژ مللەت و کەلتورێن جودا، و دهەمان دەم دە پێدڤیە گەنج یێ هۆشیاربیت و هاوسەنگیێ دناڤ هەردوو جیهانان دا دروستبکەت داکو کاریگەریا نەرێنی لسەر ژیانا وان نەهێتەکرن و پەیوەندیێن وان د ساخلەم بن.