کونسولێ ئەلمانیا:دێ ل سه‌ر پشته‌ڤانيا ئێزدیان دبه‌رده‌وام بين
سەما:
دچارچووڤێ شه‌شه‌مين کۆنفرانسێ (لالش یێ ئاشتی و پێکڤەژیانێ دە)،كو ئيرۆ 25ى حوزه‌يرانێ ل هه‌ولێرا پايته‌خت ب ڕێڤه‌چوو،کلاوس سترایشێر کونسولێ گشتى يێ ئەلمانیا ل هه‌ولێرێ په‌يڤه‌ك پێشكێشكر و ڕاگه‌هاند؛ ئەلمانیا کۆمکوژیا بسه‌رێ ئێزديان دا هاتى ژبیر ناکه‌ت و هاریکاری و پشته‌ڤانى مە بۆ ئێزدیان دێ دبەردەوام بن.
کلاوس سترایشێر دپه‌يڤا خۆ دا باس ل وەرگرتنا پەنابەرێن ئێزدی کر و گۆت:مە هەمبێزا خوە ژ گەلەک ئێزدیان رە ڤەکرییە و گەلەک شانازیێ دبه‌م ئيرۆ وەک نونەرێ ئەلمانیا دڤێ کۆنفرانسێ دە بەشدارم و د خوازم جارەکا دی ژ وەرە بێژم ئەلمانیا دێ هاریکاریێن خوە بەردەوام بکەت و ئەڤ ژی هێلا سۆر یا مەیە.
كلاوس ل سه‌ر توندوتژیا سێکسی یا ل دژی ژنێن ئێزدی هاتی کرن ئاخڤى و ئاماژه ب وێ چه‌ندێ دا ئەم دێ ل دژی توندوتژیا سێکسی یا ل بەرامبەر ئێزدیان هاتییە کرن ب سەکنين و هەتا نهۆ ژی ل سەر کار دکه‌ين و ژبۆ ڤێ مەرەمێ وەزیرا دەرڤە یا ئەلمانیا (ئەنالەنا باربووچ ) دوو جارا هاتییە عێراقێ و ب کچ و ژنێن ئێزدی ڕا کۆم بوو و ب چاڤێ خوە ژی شنگال دیت،هەروەسا چوو گوندێ کۆچۆ ژی کو بەری چەند سالان کۆمکوژیەکا مەزن لێ هاتبوو کرن.
د بەردەوامیا ئاخفتنا خۆ باس ل تاوانێن داعشێ ل دژی ئێزدیان کر و گۆت: نابت ئەم وان کۆمکوژیا ژبیر بکه‌ين،بەلێ راستە ئەم نکارن ئەوان کەسێن کو ژیانا خۆ ژ دەست داین ڤەگەرینن لێ ئەم دکارن ژبۆ دادپەروەریێ کار بکه‌ن و وان تاوانبارا بده‌ينە دادگەهێ و پەرلەمانێ ئەلمانیا ل سالا 2023 ئەو کۆمکوژیا ل دژی ئێزدیان ب جینۆساید ناسکر و ژ سالا 2014 ڤە وەلاتێ ئەلمانیا ل سەر وی بابەتێ کار دكه‌ت.
ناڤبرى ديار ژى كر؛ئەلمانیا یەک ژ وەلاتێن هەری ل پێشە کو دخوازت تاوانبار بێنە دادگەهکرن کو ئەڤ ژبۆ ئاشتیێ گرنگە و ژ بۆ مرۆڤێن قوربانیان ژی گەلەک گرنگە کو ژ ئالیێ دەروونی ڤە ژ وێ قۆناغێ دەرباز ببن.
كونسولى ئاشكه‌راكر: ل زانکۆیا دهۆک سەنتەرەک هاریکاریێن دەروونی دده‌تە وان کەسێن ژ دەستێ داعشێ رزگاربووین.
ل داويا په‌يڤا خۆ دا گۆت: ژ عێراق و هەرێما کوردستانێ دخوازين هاریکاریێن وان ئێزدیان دبەردەوام بن و نابت ئێدی ئاوارە دناڤ که‌مپاندا بمینن و دڤێت دەلیڤەک بێتە دیتن کو هەردوو حکومەتێن عێراق و هەرێمێ ئاواران ڤەگەرینن سەر جهێن وان.