شنگال و ڤه‌گه‌ریانا ئاواره‌یان
عه‌لی شه‌مۆ
ده‌رباره‌ی بابه‌تێ ئاوه‌ریان و ڤه‌گه‌ریانا وان بۆ سه‌ر مال و حالێن خوه؛ ئه‌گه‌ر ل مێژوویی ڤه‌گه‌رن و به‌رێ خوه بدنێ هه‌ر چه‌ند سالان كو ملله‌تی ئێزیدی روی ب روی كاره‌ساته‌كێ یان جینۆسایده‌كێ بوویه، لێ داوی جینۆساید ژی كو ل ٣/٨/٢٠١٤ ل شنگالێ ڕووی دا و ب هزاران كه‌س بوونه قوربانی ل هه‌مان ده‌م دا كه‌چ و ژن ل بازاران كرین و فرۆتن پێ كرن و بۆ حه‌زێن خوه یێن خراب بكارئینان، هه‌ر وه‌سا گه‌نج بۆ له‌شكریێ بكاردئینان و پیر و دانعه‌مر ب ساخی بگۆر كرن و ب ده‌هان گۆرێن ب كۆم ل ده‌ڤه‌را شنگالێ ژ وان چێكرن. به‌لێ ب هزاران خێزانان ژ گوند و كۆمه‌لگه‌هێن ده‌ردۆرا چیایێ شنگالێ، خوه گه‌هاندن سه‌رێ چیای ب رزگاربووین ژ ده‌ستێن تیرۆریستێن داعش هه‌ر چه‌نده ژماره خه‌لكێ گه‌له‌گ پتر بوو ژ پێدڤیێن ژیانێ لسه‌ر چیایێ شنگالێ و ل هه‌مان ده‌م دا هاڤینه‌كا گه‌له‌گ گه‌رم و دژوار بوو و ئاڤا ڤه‌خوارنێ گه‌له‌گ ب زه‌حمه‌ت په‌یدا دبوو، به‌لێ وه‌كو هیڤیه‌ك بۆ مایین د ژیانێ دا، خه‌لكی هه‌ولدان و خوه گه‌هاندن هه‌رێما كوردستانێ بۆ قورتال بوون ژ جینۆسایدێ و ل پارێزگه‌هێن هه‌رێما كوردستانێ كه‌مپ بۆ وان هاتن دابینكرن و دروستكرن، بێگومان هه‌ر ملله‌ته‌كی ل جینۆسایده‌كێ را ده‌ربازبووی هه‌می پێدڤیێن ژیانێ ژ ده‌ستددا و هه‌روه‌سا ژلایێ ده‌روونی ژی ڤه ئالۆز و نه‌ساخ دبه‌ت ژ به‌لێ ئیش و ئازارێن جه‌سته‌ی و سخله‌می، له‌وما خه‌لك و حوكمه‌تا هه‌رێما كوردستانێ سه‌ره‌ڕای كو ژ ئه‌گه‌رێ هاتنا رێكخراوا تیرۆرستی یا داعش كه‌فتبوون روی ب رویبوونه‌كا گران و تراژیدی، به‌لێ ب هه‌می شیانێن خوه هه‌ولدان وه‌كو ئه‌ركه‌كی نه‌ته‌وی و مرۆڤایه‌تی كو هه‌می پێدڤیێن ژیانه‌كا نوی بۆ خه‌لكێ جینۆسایدكری یێ شنگالێ ل ناڤا كه‌مپان دا دابین بكه‌ن و خه‌م و ئیش و ئازارێن وان سڤك بكن. به‌لێ چیرۆكا تراژیدی زوی بداوینه‌هات! به‌رده‌وامیا وێ ١٠ سال ڤه‌كێشان و ده‌ربازبوون هێشتا ره‌ڤاندیێن وان ب ته‌مامی نه‌هاتینه رزگاركرن، گۆرێن ب كۆم ب ده‌هان ل ئه‌ردێ ماینه تژی كه‌له‌خ و هه‌ستیێن خه‌لكه‌كی بێگونه‌هان و هه‌ژارن. ب هزاران مال هه‌ڕفین و هنده‌ك گوندێن وه‌ك گرزه‌رك كاڤلبوونه.. هێشتا ب تنێ ده‌نگێ په‌پووكان ژێ دئێت و ئێك كه‌س تێدا نینه. ئه‌ڤجا دێ ڤه‌گه‌ریان ب چو ئاوایان بیت و كه‌نگی و پاشه‌رۆژ دێ چ لێ هێت؟!.
