مووسا خالد: شنگال برینهكا كووره و دیرۆكا جینۆسایدێ و خۆراگرییا ئیرادێ یه
سهما
ڕۆژەکا ڕەش د مێژوویا مرۆڤایەتیێ و گەلێ مە دا، ڕۆژێن تاری و سەخت کێم نینن، بەلێ ٣ێ ئابا سالا ٢٠١٤ێ، برینەکا هندە مەزن و کوور د لهشێ مللەتێ مە دا چێکر کو ههتا نهۆ ژی هێش خوین ژێ دچت، تاوانا جینۆسایدا شنگالێ ئەوا ژ لایێ تیرۆرستێن داعشێ ڤە هاتییە ئەنجامدان نەبتنێ کوشتن و وێرانکرنا دەڤەرەکا ئاڤەدان بوو، بەلکو هەولەکا چەپەل و دڕندانە بوو بۆ ژناڤبرنا ڕیشەیێن کەڤنترین و ڕەسەنترین پێکهاتەیێ ڤێ ئاخێ، کو ئول و کەلتوورێ کوردێن ئێزدی یە، ئەو ڕۆژە بوو کو دەولەتێن جیهانێ ب چاڤێن خۆ دیت داعشێ دڤیا کەرامەتا مرۆڤى بن پێ بکن.
د وێ ڕۆژا نەخۆش دا، ب هزاران بنەمالێن کوردێن ئێزدی توشی ڕەڤاندن، کوشتنا ب کۆم، و بێبەشکرن ژ بنەڕەتیترین مافێن ژیانێ بوون، زەلامێن بێگونەهـ هاتنە گولەبارانکرن و د گۆڕێن ب کۆم دا هاتنە ڤەشارتن، ژن و کچێن وان هاتنە فرۆشتن د بازاڕێن ڕەشێن کۆیلایەتیێ دا ل موسل و ڕەققە و دەڤەرێن دی، هەروەسا زارۆکێن بچوک هاتنە ڕەڤاندن دا کو مێشکێ وان بهێتە شوشتن و ئایدۆلۆژیایا کوشتنێ و توندڕەویێ فێر ببن.
چیایێ شنگالێ بوو دووماهیک پەناگەهـ بۆ ب هزاران خێزانێن برسی و تێهنی کو ژ ترسا تیرۆرستان بەر ب چیایی ڤە ڕەڤیبوون. ل سەر سەری گەرماتیا دژوار یا هاڤینێ و ب بێ ئاڤی و خوارن، ب سەدان زارۆک و پیر د باوەشا چیایی دا گیانێ خۆ دەستدا، ئەڤ تاوانە، ب هەموو پێڤەرێن یاسایی و نێڤدەولەتی، جینۆسایدەکا تەمام بوو، چونکی مەبەستا وێ تێکدانا ناسنامە و ئایین و ڕەگەزێ جڤاکەکى بوو.
ئیرۆ، پشتی بۆرینا ۱۲ سالان سەر وێ تاوانا مەزن دا دەرباز بووین، برینا شنگالێ هێشتا ساخ نەبوویە و یا بریندارە، تا نهۆ ژی ب هزاران کەسێن هاتینە ڕەڤاندن بێسەروشوێنن و چ چارەنڤێسێ وان دیار نینە، و ب هزاران خێزانێن شنگالێ د کەمپێن ئاوارەییێ دا د ژیانەکا سەخت دا ژیانێ دەربازکرن، ڕێزگرتن بۆ قوربانیێن شنگالێ بتنێ ب ئاخفتنێن خەمگین و دروشمان چێنابت، بەلکو ئەرکێ مە هەموویانە کو شنگال ب شێوەیەکێ کرداری بهێتە ئاڤادانکرن، تاوانبارێن ڤێ کارەساتێ بهێنە دادگەهکرن، و ئارامی و ئەولەهی بۆ وێ دەڤەرێ بهێتە زڤڕاندن دا کو خەلک ب سەربلندی بزڤڕنە سەر گوند و مالێن خۆ، شنگال نە تنێ برینەکە، بەلکو شاهدا شکەستنا تاریاتیێ و سەرکەفتنا ئیرادەیا ژیانێ و کەرامەتا مرۆڤی یە.
