ناڤەندا نووچەیان – سەما
وشیان خودێدا ئۆمۆ، ئەنداما پەرلەمانێ کوردستانێ گۆتنێن پەرلەمانتارێ عێراقێ موراد ئیسماعیل، دەربارەی نوونەراتیيا ئێزدییان د پەرلەمانێ کوردستانێ دا رەت دکەت و راگەهاند، گۆتنێن وی د بێ بنه‌مانه و دوورن ژ ڕاستییێ و زێدەگاڤییە ل سەر هه‌بوونا مه ل په‌رله‌مانێ كوردستانێ.
وشیان خدێدا ئۆمۆ، ئەنداما پەرلەمانێ کوردستانێ و تاكه نوونه‌را ئێزدييان ل په‌رله‌مانى راگەهاندنەک به‌لاڤ كر و تێدا نڤيسييه، ئەز ئەندامەکا ئێزدی مە ل پەرلەمانێ کوردستانێ و نوونەرا ئێزدییانم د پەرلەمانێ کوردستانێ دا.
ئەنداما پەرلەمانێ کوردستانێ گۆتژى: “د ئه‌زموونا جوان یا ئازادی و پێکڤەژیانا كوردستانێ دا چو جاران ئێزدی ژ پەرلەمانێ کوردستانێ بێبەهر نەبووینە، د هه‌ر شه‌ش خولێن په‌رله‌مانی دا پەرلەمانتارێن ئێزدی هەبووینە و وان نوونەراتییا جڤاکێ خۆ کرییە بەری کو نوونەراتییا پارتێن خۆ بکەن.”
ئه‌و چه‌نده ژى دياركر، ئالییه‌كی دیتر ڤه ، دەمێ تو دبێژی: «نیڤ کورسی ژی نینە»، ئەڤ یه‌كه بێرێزیکرن و ئینکارکرنا هەبوونا پەرلەمانتارێن ئێزدی یە کو ئیرۆ د ناڤ پەرلەمانی دا کار دکەم و کێمکرنە ژ بزاڤێن مه و بزاڤێن هەموو وان ئێزدییێن د ناڤ دامودەزگەهێن هەرێمێ دا کار دکەن.
دوپاتكر ژى، شنگال و هه‌موو جڤاكا ئێزدی پرسا هەموو ئێزدییان و هەموو کوردستانێ یە، نە کارتەکە بۆ مزایدێن سیاسی. یا خویایە کو ئێزدییاتی ب تنێ د ناڤ کوردستان دا گەشە دکەت و چو جاران ژ ئێک نائێنە ڤەقەتاندن.
ئەگەر مە بڤێت ب ڕاستگۆیی بەرگرییێ ژ شنگالێ بکەین، بلا ئەم دانپێدانێ ب هه‌بوونا ئێکودو بکەین نه‌ك بەروڤاژی.
و دڤیا بزاڤێن خۆ بکەینە ئێک بۆ خزمەتکرنا ئێزدییان ل هەموو دەڤەرێن وان و بلا ب واقعیانه سه‌ره‌ده‌ریێ بكه‌ن نه‌ك ب هه‌ڤركی و دروشمان.
ئاماژه ب وێ چه‌ندێ دا، جوداهییا سیاسی وێ ڕامانێ نادەت کو ئەم هەبوونا نوونەرێن خۆ ژ ناڤ ببەین.
نوونه‌را ئێزدييان ئاشكراكر: ” ل جهێ كو به‌رێز موراد اسماعیل به‌حس ل ماف و مه‌غدووری و سه‌ره‌ده‌ریێن شاش یێن به‌غدا ل گه‌ل دۆسیەیا ئێزدییان و شنگالێ بكه‌ت، هاتییه ئه‌زموونا دیموكراسی یا په‌رله‌مان و هه‌رێما كوردستانێ له‌كه‌دار دكه‌ت.”
هه‌روه‌سا به‌حس ل په‌رله‌مانێ عێراقێ دكه‌ت و دبێژت: په‌رله‌مانێ عێراقێ یێ كو ب یاسا جینۆسایدكرنا ئێزدییان ل شنگالێ په‌ژراندی و ژبیركریه هەتا نهۆ په‌رله‌مانێ عێراقێ ئه‌ڤ پرسه پشتگوهـ هاڤێتیه و دانپێدان پێ نەکریە.
راگه‌هاند ژى: “ئه‌ركێ وه‌یه ل به‌غدا كار بۆ زڤراندنا دادپه‌روه‌رییێ ژ هه‌موو ڕوویه‌كی ڤه بۆ مه‌زلوومیه‌تا ئێزدییان بكه‌ن، جڤاكا ئێزدی ب گشتی ڕه‌ش و سپی ژ هه‌ڤ جودا دكه‌ت و تێگه‌هشتنا ئێزدییان هه‌یه كو قه‌دره‌كێ باش یێ نوونه‌راتییێن خوه د ناڤا جۆمگەیێن حوكمرانیا كوردستانێ دا هه‌بوویه و ئه‌و پێكڤه‌ژیان و دادپه‌روه‌ریا ل ژێر سیبه‌را سه‌رۆك بارزانی د كوردستانێ دا هه‌یی دڤییا ببته ده‌رس و بێته په‌یڕه‌و كرن ل هه‌موو عێراقێ.”
ل داوييا په‌ياما خۆ دا گۆت: ” یێ نكولیێ ل وی كەسی بكەت یێ بوویە ئەگەرێ سەركەفتنا وی و ب سەر پێپەلكێن قوربانیدانا كەساتی دا باز بدەت ژ پێخەمەت دەستكەفتان چو جاران نکارت یێ ئەمین بیت ل سەر دۆزێن ملەتان.. و بۆ ئاقلمەندییێ ئیشارەتەك بەسە.”