ناڤه‌ندا نووچه‌يان – سه‌ما
ئەنجوومەنێ وەزیرێن هەرێما کوردستانێ دووپاتكر، كو نابت ل ژێر چ بەهانەیەکێ، قوتێ موچەخۆرێن هەرێمێ بۆ هەشت هەیڤێن بێت راگرت. دبێژت: حکومەتا فیدڕاڵ ب ڤێ بڕیارا سیاسی ئابلۆقێ دئێختە سەر هەرێمێ و ئەڤ بڕیارە سزادانا ب کۆمە بۆ هەموو خه‌ڵكێ هەرێما كوردستانێ.
ئيڕۆ چارشەمبوويێ 4ی حوزه‌یرانا 2025ێ، ب سەرپەرشتيیا مەسرور بارزانی سه‌رۆكێ حكومه‌تا هه‌رێما كوردستانێ و ب ئامادەبوونا قوباد تالەبانی، جێگرێ سه‌رۆكێ حكومه‌تێ، ئەنجوومەنێ وەزیرێن هەرێما کوردستانێ کۆمبوو.
ب گۆڕه‌ی ڕاگەهاندنا ئەنجوومەنێ وەزیرێن هەرێما کوردستانێ، بڕگا ئێكێ یا کۆمبوونێ، یا تایبەت بوو ب دووڤچوونا جڤاتا وەزیران بۆ بابەتێ موچەیێ موچەخۆرێن هەرێما کوردستانێ، ل ده‌ستپێكێ مەسرور بارزانی سه‌رۆكێ حكومه‌تا هه‌رێما كوردستانێ، باسێ وێ چه‌ندێ كر کو هەرێما کوردستانێ هه‌موو پابەندیێن خۆ بە ته‌مامى جێبەجێكرينه وشەفافانە سەرجەم داتا و زانیاریێن دارایی بۆ تیمێ هه‌ڤبەشێ هەردوو دیوانێن چاڤدێرییا دارایی فیدراڵ و هەرێمێ به‌رچاڤكرن و ل ده‌ستپێكا ساڵا دارایی 2025 ڕێککەفتنا هه‌ڤبەش دناڤبه‌را هەردوو وەزارەتێن داراییا فیدراڵ وهەرێمێ هاته ئیمزاکرن بۆ دابینکرنا تەڤاهیا مووچەيێ هه‌يڤێن ئيساڵه، ئەو ژى گرێدا ب بڕیارا دادگه‌ها فیدراڵی کو ڕێ نادات ناکۆکیێن ناڤبه‌را هەردوو حکومەتان ل سەر جێبەجێکرنا یاسایا بوودجێ، هۆکار بت بۆ ڕاگرتنا خەرجکرنا مووچەیێ مووچەخۆرێن هەرێمێ.
ته‌كه‌ز ل وێ چه‌ندێ كر، دەستوورێ عێراقێ بنەمایێ یەکسانییێ دناڤبەرا هەموو عێراقییان دا جهگیرکرییە و نابیت ل ژێر چ بەهانەیەکێ، قوتێ موچەخۆرێن هەرێمێ بۆ هەشت هەیڤێن بێت ڕاگرت” لەوما حکومەتا فیدڕالی ب ڤێ بڕیارا سیاسی؛ ئابلۆقێ دئێختە سەر هەرێمێ و ئەڤ بڕیارە سزادانا ب کۆمە بۆ هەموو خه‌ڵكێ هەرێما كوردستانێ.
هەروەسا ئه‌نجوومه‌نێ وەزیران بڕیارا ڕاگرتنا موچەیێ هەرێما کوردستانێ ب نە دەستووری و نە یاسایی دزانت و داخواز کر جڤاتا وەزیرێن فیدڕالی، پێداچوونا پێدڤی ل د ڤێ بڕیارا وەزارەتا داراییا فیدڕالی بکەت لبەر ڕۆناهییا بڕیارا دادگەها بلندا فیدڕالی، هەروەسا بڕیار هاتەدان نامەکا فەرمی ئاراستەیی جڤاكێ نێڤدەولەتی و نوونەرێن وەلاتان بهێتە كرن و تێدا لایەنێ دەستووری و یاسایی و دارایی بێنە رۆنكرن.
بڕگا دووێ یا كۆمبوونێ، تایبەت بوو ب بەرچاڤكرنا نڤیسارا وەزارەتا کاروبارێن شەهیدان و ئەنفالکرییان کو پێشنیار کرییە لێخۆشبوون بۆ کوڕ و کچێن شەهیدان و زیندانیێن سیاسی بهێتە كرن” ژ پێشینەیا هەڤژینییێ ل سەر بنەمایێ بڕیارا جڤاتا وەزیران ژمارە 158 ل 2025/3/12 بۆ ئەوێن مفادارببون ژ مینحە و دیارییا هەڤژینیێ.
بڕگا سێیێ یا تایبەت بوو ب بەرچاڤركرنا بابەتێ کارمەندێن گرێبەست ل سەر بودجەیێ پەرەپێدان و داهاتێ و پێشینەیا بەردەوام و کرێیا رۆژانە.
هه‌روه‌سا ب هه‌لكه‌فتا جه‌ژنا قوربانێ، ئه‌نجوومه‌نێ وەزیران بڕياردا كو ڕۆژا ئينيێ 2025/6/6 هەتا ڕۆژا دووشەمبوويێ 2025/6/9 بێهنڤەدانا فەرمییە، ب هەلكەفتا جەژنا قوربانێ و ڕۆژا سێ شەمبوويێ 2025/6/10 دەوامیا فەرمی دێ دەستپێكەت.
