ناڤه‌ندا نووچه‌يان – سه‌ما
مه‌سرور بارزانی، سه‌رۆكێ حكومه‌تا هه‌رێما كوردستانێ په‌یامه‌كا پیرۆزباهیێ ب هه‌لكه‌فتا جه‌ژنا قوربانێ ئاراستەی گشت موسڵمانێن هەرێما کوردستانێ، عيراقێ و جیهانێ كر؛ دبێژت، دێ هەموو بزاڤان کەت بۆ دەربازکرنا ڤێ ڕەوشێ و ژناڤبرنا ئەڤێ ستەما نەڕەوا یا بەرامبەر مووچەخۆرێن هەرێما کوردستانێ دئێتەکرن.
پێنج شه‌مبوويێ، 5ـی حوزه‌یرانا 2025، مه‌سرور بارزانی، سه‌رۆكێ حكومه‌تا هه‌رێما كوردستانێ په‌یامه‌كا پیرۆزباهیێ ب هه‌لكه‌فتا جه‌ژنا قوربانێ ئاراستەی گشت موسڵمانێن هەرێما کوردستانێ، عيراقێ و جیهانێ كر و ڕاگه‌هاند، ب تایبەتى جەژنا پێشمەرگەیێن قەهرەمان و هێزێن ئاسایشا ناڤخۆ و کەسوکار و مالباتێن سەربلندێن شەهید و ئەنفالکرییان پیرۆز بت. هیڤیدارم ڕۆژێن جەژنێ ب ئارامی و بەختەوەری ب بوورینن.
سه‌رۆكێ حكومه‌تا هه‌رێما كوردستانێ مه‌سرور بارزانی د په‌یاما خۆدا دبێژت: جهێ داخێ و خەمگینییەکا کوورە، ئەڤێ جەژنێ د ڕەوشەکا دژوار یا داراییدا دکەین ژ ئەگەرێ سزادانا ب کۆمەل یا هەڤوەلاتییێن هەرێما کوردستانێ ژ لایێ حکومەتا فیدراڵڤە. بەڵێ پشتڕاست دکەین کو حکومەتا هەرێما کوردستانێ، دێ هەموو بزاڤان کەت بۆ دەربازکرنا ڤێ ڕەوشێ و ژناڤبرنا ئەڤێ ستەما نەڕەوا یا بەرامبەر مووچەخۆرێن هەرێما کوردستانێ دهێتەکرن.