ناڤهندا نووچهيان – سهما
لقێ 17 يێ پارتى ديموكراتى كوردستان ل شنگالێ ل دوازدەهەمین سالیادا تاوانێن جینۆسایدێ و کۆمكوژییا گوندێ كۆچۆ ل شنگالێ، پەیامهك بهلاڤکر و تێدا هاتييە،گوندێ كۆچۆ بوو شاهدێ تاوانهكا كۆمكوژيێ (جينۆسايدێ)، كو ب سەدان شههيد، بهرزهبووى، و ڕزگاربوويێن ژن و زهلام ل پاش خۆ هێلان.
دهقێ پهيامێ:
ب ئێش و ژانهكا كوور ڤه، ئێك ژ درندهترين تاوانێن كو د دژى خهلكێ مه يێن ئێزدى ژ لايێ ڕێكخراوا تيرۆرستيا داعشێ ڤه هاتيه ئهنجامدان ب بير دئينين؛ د وێ ڕۆژێ دا گوندێ كۆچۆ بوو ديدهڤانێ تاوانهكا كۆمكوژييێ (جينۆسايدێ)، كو ب سەدان شههيد، وندابوويى، و ڕزگاربوويێن ژن و زهلام ل پاش خۆ هێلان.
كۆمكوژييا گوندێ كۆچۆ ب تنێ بيرهاتنهكا بۆرى نينه، بهلكو بڕينهكا زيندى يه د بيردانكا ئێزدييان دا، و بهلگهيهكێ ئاشكرايه ل سهر مهزناتييا وێ ئێش و ئازارا ڤى پێكهاتهيى ديتى ژ ئهگهرێ تيرۆر، توندڕهوى و كهربوكينێ.
د ڤێ بيرهوهرييا دلتهزين دا، سلاڤ ل سهر گیانێ پاكێ شههيدێن كۆچۆ و ههموو قوربانييێن جينۆسايدا ئێزدييان، و وێرهكى و خۆڕاگرييا خهلكێ وى گوندى ب بير دئينين. ههروهسا ئهم ديسا ههڤسۆزى و پشتهڤانييا خۆ بۆ ڕزگاربوويان، بنهمالێن قوربانى و وندابوويان دوپات دكهين.
دلۆڤانييا خودێ ل جانگۆڕييێن كۆچۆ و ههموو جانگۆڕييێن جينۆسايدا ئێزدييان بت، خودێ ڕزگاربوويان بپارێزت، وندابوويان ڤهگهڕينته ناڤ بنهمالێن وان دا، ئارامى، ئاشتى و سهربلندييێ ب دهتە گهلێ مه.
12 سال ب سەر کۆمکوژييا گوندێ کۆچۆ سەر ب قەزا شنگالێ دهرباز دبن، کو ژ ئالييێ داعشێ ڤه ب سەدان وهلاتييێن ئێزدى يێن بێ گونههـ هاتنه كوشتن و ب سەدان هاتنه ڕهڤاندن.