ب هەلکەفتا سالیادا ڕزگارکرنا شنگالێ، وەکی ڤێ رۆژێ ، ساڵا ٢٠١٥،شنگال ژێر دەستی تیرۆرستین داعش هاتە ئازاد کرن، ئەو ئازادکرنە ب سەرپەرشتییا ڕاستەوخۆیا جەنابێ سەرۆک و ڕێبەرێ نەتەوەیی، کاک مەسعود بارزانی و ب دەستێ هێزا پێشمەرگەیێ قەهرەمان، هێزا شانازی و مێرخاسییا کوردستانێ، هاتە ئەنجام دان.
ئەو ڕۆژە نە تەنێ ڕۆژەکە سەرکەفتنا سەربازی بوو، بەڵکو ڕۆژەک بوو کو خوونا قەهرەمانان، فرمێسکێن دایکان، ئازار و هیڤیێن هەزاران مرۆڤێن بێتاوان تێکەڵی یەک بوون.
سۆزا جەنابێ سەرۆکی بۆ ئێزدییان ل ٢١ی کانونا ئێکێ ٢٠١٤ بوو، کو هەتا شنگال نەئێتە ئازاد کرن، خەباتا پێشمەرگەی هەر بەردەوام بت و نەزڤرنە مالێ.
پێشمەرگە ل وێ ڕێکا خەبات و قوربانییان دا، ب ئیرادەیەکا بهێز و باوەرییەکا قایم، بەرهنگاری تیرۆرێ بوو و بۆ ئازادییا شنگالێ گیانێ خۆ دانا، هەتا دۆرپێچا تیرۆرستێن داعشێ هاتە شکاندن.
د وێ ئۆپەراسیۆنا سەخت و دژوار دا، نێزیکی (٥٠٠) پێشمەرگەیێن قەهرەمان شەهید بوون و زێدەتر ژ هەزار پێشمەرگە بریندار بوون، و ئەوان ب خوونا خۆ نیشان دا کو پاراستنا خاک و مرۆڤاتییێ بەرپرسیارییەکا نیشتمانی و مرۆڤاتییە.
شنگال، ئەو باژێڕێ د مێژوویێ دا گەلەک قوربانی دایی، هێش ژ برینێن کوور چاک نەبوویە، چونکی پشتی ئازادکرنا وێ، ڕوو ب ڕوویێ زۆر ئاستەنگ و ئالنگاریێن سیاسی و ئەمنی بوو، ب تایبەتی ژبەر هاتنا هێز و لایەنێن ئەمنیێن جیاواز و نەخواز بۆ ناڤچەیێ، ئەڤە ژی کاریگەرییەکا مەزن ل سەر ئارامی و سەقامگیرییا وێ هەبوو.
بەلێ، سەرەڕای هەموو ڤان ئالنگارییان، شنگال هەر وەک هەردەم نیشانا خۆڕاگرییێ و سیمبولا ئاشتیخوازی و پێکڤەژیانێیە.
شنگال ئیرۆ پێدڤی ب زێدەکرنا هێزێن بیانی و ناکۆکییێ نینە، بەلکو پێدڤی ب ئێمناهییەکا جهگر یا ل سەر ئیرادەیا خەلکێ وێ، ڤەگەڕاندنا ئاوارەیان، ئاڤاکرنا وێرانبوویان، قەرەبووکرنا زیانلێکەفتییان و دابینکرنا ژیانەکا ئازاد بۆ هەموو پێکهاتەیێن وێ هەیە.
شنگال یا ئاشتی و پێکڤەژیانێیە، نە مەیدانا ناکۆکی و ململانێ یە. وەک چاوا ڕۆژەکێ ب خوون و قوربانییان هاتە ئازاد کرن، ب سەرپەرشتییا جەنابێ سەرۆک بارزانی، ئەڤرۆ ژی پێویستە ب هەول و ئیرادەیەکا هەڤبەش شنگال بۆ خەلکێ شنگالێ ڤەگەڕت ، ئەو خەلکێ شنگالا خۆڕاگر و خودان هەلوەست، کو د ڕۆژێن سەخت و دژوار دا کوردستانییا شنگالێ پاراستییە، دا داهاتییەکا ئارام و پڕ هیڤی بۆ نەوەیێن داهاتی دورست بکەن.
هەزاران سلاڤ بۆ گیانێ پاکێ شەهیدان، سلاڤ بۆ خێزانێن قوربانیێن شنگالێ، و سلاڤ و ڕێز بۆ هەموو پێشمەرگەیێن قارەمان، کو بوونە قەلغانێ پاراستنا خاک، نیشتمان و کەرامەتا مرۆڤاتیێ.