ناڤەندا نووچەیان – سەما
وەزارەتا پێشمەرگەی یا حکومەتا هەرێما کوردستانێ ب هەلکەفتا 11هەمین سالڤەگەرا رزگارکرنا قەزایا شنگالێ ژ دەستێن تیرۆریستێن داعشێ بەیاننامەیەک بەلاڤکر و دبێژت: ئەو ئۆپەراسیۆنە ستراتیژی بوو و وەرچەرخانەکا سەربازی بوو، کو تێدا پێشمەرگەی کاری بگەهتە چیایێ شنگالێ و ڕێکا سەرەکییا شنگال–کوردستانێ ڤەکەت.
دەقێ بەیاننامەیێ:
د سالڤەگەڕا ئازادکرنا قەزا شنگالێ ژ دەستێ تیرۆریستێن داعشێ دا، ب ڕێز و سوپاسییەکا مەزن ڤە، ئەم یادا وێ داستانا مێژوویی دکەین، یا کو تێدا هێزێن پێشمەرگەیێن کوردستانێ ب خوون و قوربانیدانا خۆ کارین دووماهییێ ب یەک ژ تاریترین قۆناغێن مێژوویا دەڤەرێ بینن و هەیبەت و ئازادییێ بۆ خەلکێ خۆڕاگر یێ شنگالێ ڤەگێڕین.
پرۆسێسا ئازادکرنا شنگالێ د سالا ٢٠١٥ دا، ب سەرپەرشتییا ڕاستەوخۆ یا سەرۆک مەسعود بارزانی، هاتە ئەنجام دان. ئەو ئۆپەراسیۆنەکا ستراتیژی بوو و وەرچەرخانەکا سەربازی و مرۆڤانە بوو، کو تێدا پێشمەرگەی کاری هێلا سەرەکییا گەهاندنا هاریکارییێ بۆ تیرۆریستان د ناڤبەرا عێراق و سووریێ دا ببڕت، بگەهتە چیایێ شنگالێ و ڕێکا سەرەکییا شنگال–کوردستانێ ڤەکەت.
هەروەسا پێشمەرگەی کاری ئەفسانەیا داعشێ تێکبشکینت. ئەڤ سەرکەفتنە بەرهەمێ یەکڕیزی، پلانداڕشتنا هوور یا سەربازی و ئازایەتییا بێوێنەیا پێشمەرگەی بوو، یا کو بوو جهێ حێبەتی و ستایشا هەمی جیهانێ.
د ڤێ یادا پیرۆز دا، سەرێ ڕێز و نەوازشێ بۆ ڕوحا پاک یا هەموو جانگۆرییێن ڕێکا ئازادیا کوردستانێ، و ب تایبەتی بۆ شەهیدێن داستانا ئازادکرنا شنگالێ دچەمینین.
هەر بلند و سەرفەراز بیت ئالایێ کوردستانێ.
سلاڤ ل گیانێ پاک یێ شەهیدان و هێزا پێشمەرگەیێ کوردستانێ.