ناڤهندا نووچهيان – سهما
پشکا ژینگەها تهلهعفەر یا سەر ب رێڤەبەرییا ژینگەها نەینەوا ڤە، دووڤچۆنەکا مەیدانی بۆ کارگەها چهمەنتۆیێ ل شنگالێ ئەنجام دا و بەلاڤبوونا تۆزێ تۆمارکر و هۆشدارى دا كارگههێ.
ژ ئەگەرێ سهكناندنا فلتەران د هەردو قۆناغێن شکاندن و هێڕانا کەرەستەیێن دەستپێکی دا، زێدەباری قۆناغا تژیکرنا چهمەنتۆیێ تۆز دبارت و ژينگههێ تێكددهت.
ئەندازیار خالد عەلی سوڵتان، رێڤەبەرێ گشتی یێ فەرمانگەها پاراستن و باشکرنا ژینگەهێ ل دەڤەرا باکوور، دووپات کر، فەرمانگەها وان یا بەردەوامە ل سەر ئەنجامدانا گەڕیێن خۆ یێن چاڤدێریکرنێ ل سەر چالاکیێن پیشەسازی و دووڤچۆنا رادەیێ پێگیرییا وان ب رێنماییێن ژینگەهی، و تەکەزی ل سەر پێدڤییا چارەسەرکرنا سەرپێچیان و کێمکرنا بەلاڤبوونا ماددەیێن پیسکەر کر، ب مەرەما پاراستنا ژینگەهێ و ساخلەمییا گشتی.
ههروهسا د. عەبدولمونعم زرار جبووری، رێڤەبەرێ ژینگەها نەینەوا، دیار کر، هۆشداری ڕابهرى کارگێرییا کارگەهێ هاتییە کرن بۆ نههێلانا سەرپێچیێ و چارەسەرکرنا ئەگەرێن بەلاڤبوونا تۆزێ، ل دووڤ حوکمێن یاسایا پاراستن و باشکرنا ژینگەهێ یا هژمار (27) یا سالا 2009، دووپاتکر کو دووڤچۆنێن مەیدانی دێ د بەردەوام بن و رێکارێن یاسایی یێن پێدڤی دێ بەرانبەر سەرپێچیکاران ئێنە وەرگرتن.
د ماوهيێ چهند رۆژێن بۆرى دا خهلكێ شنگالێ گازنده ژ تۆزا ژ كارگهها چهمهنتۆيێ دهردكهڤت كرن كو كارتێكرنێ ل ساخلهمييا مرۆڤى و ژينگههێ دكهت و خواستن ئالييێن پهيوهنديدار چارهيهكێ ل ئهڤێ كێشهيێ بكهن.
