ناڤه‌ندا نووچه‌يان – سەما
وەزارەتا خواندنا بلند یا هەرێما کوردستانێ ڕاگەهاند، ژ ئيرۆ پێنجشه‌مبێ زانکۆلاین بۆ دەرچۆیێن 12ێ ئامادەیی ل ده‌ڤه‌رێن کوردستانی یێن دەرڤەی ئیدارەیا هەرێمێ دئێتە کارا کرن.
وەزارەتا خواندنا بلند و ڤەکۆلینێن زانستی یا هەرێما کوردستانێ، د ڕاگەهاندنەکێ دا دەرچۆیێن پۆلا 12ێ ئامادەیی ل ده‌ڤه‌رێن کوردستانی یێن دەرڤەی ئیدارەیا هەرێمێ (کەرکووک، شنگال و خانەقین) ئاگەهدار دکەت و دبێژت: ل پێنجشەمبێ 15ـی چريا ئێكێ 2026، هەتا دەمژمێر 12ـی ڕۆژا دوشەمبێ 19ـی چريا ئێکێ 2026، هون دكارن ل هەمان سایتێ زانکۆلاین داخوازیا خۆ بۆ وەرگرتنێ ل زانکۆیێن حکومی یێن کوردستانێ پێشکێش بکەن.
د ڕاگەهاندنێ دا هاتییە، هەموو دەرچۆیێن قوتابخانێن کوردی یێن ده‌ڤه‌رێن کوردستانی یێن دەرڤەی هەرێما کوردستانێ، ئەوێن ناڤێن وان ل نڤیسینگەها کەرکووک یا وەزارەتا خواندنا بلند تۆمارکری، ژ دەمژمێر 8:30ـی سبا پێنجشەمبێ هەڤشێوەیێ دەرچۆیێن هەرێما کوردستانێ، دكارن داخوازیيێ ب ڕێيا زانکۆلاین بۆ وەرگرتنا وان ل زانکۆیێن حکومی یێن هەرێما کوردستانێ پێشکێش بکەن.
وەزارەتا خواندنا بلند ئەو ژى ڕاگەهاندییە، ئەڤ سالە دو هه‌زار و 700 ژ دەرچۆیێن 12ـی ئامادەیی یێن ده‌ڤه‌رێن کوردستانی، دكارن ب کۆدێن خۆ بچنە د ناڤ سیستەمی دا و ڕاستەوخۆ داخوازیيێ بۆ وەرگرتنێ ل هەمان سایتێ زانکۆلاین پێشکێش بکەن.