سه‌ما
باليۆزخانه‌يا ئه‌مريكا ل عيراقێ ل بيره‌وه‌ريا 10 ساڵيا جينۆسايدكرنا ئێزديان دهه‌ڤپه‌يڤينه‌كا تايبه‌ت دا ل گه‌ل سه‌ما،باس ل هه‌ڵويستێ وه‌لاتێ خۆ به‌رامبه‌ر شنگال و ئێزدیان دكه‌ت.
ل ماوێ 10سالێن بۆرى دا چ بۆ كه‌يسا جينۆسايدا ئێزديان كريه؟
دەولەتێن ئێکگرتی يێن ئەمريکا رێزێ ل قوربانيێن جينۆسايدا ئێزديان دگريت کو بەری 10 سالان ژ ئاليێ تيرۆرستێن داعشێ ڤە هاتە ئەنجامدان، ئەم پابەندين ب پشتەڤانيکرنا رزگاربوويان د بدەستڤەئينانا دادپەروەريێ و ئاڤاکرنا مال و وارێ وان دە،ژ سالا 2018ێ ڤە ئەمريکا زێدەتری 500 مليۆن دۆلار دابين کرينە ژ بۆ پشتەڤانيکرنا ئێزديان و رزگاربوويێن دی يێن دەستێ تيرۆرستێن داعشێ و پێشخستنا پررەنگيا ئۆلی و ئێتنيکی ل عيراقێ، ئەڤ ژی ژ بۆ هاريکاريدانا ب ئارمانجا ساخبوون و ڤەگەراندنا ڤان جڤاکان بۆ ژيانا وان يا ئاسايی.
هەروەسا مە پشتەڤانيا دارايی دابين کريە ژبۆ نويکرنا ژێرخانێن بنگەهين و پێشکێشکرنا خزمەتگوزاريێن دەروونی و چێکرنا بەلگەيێن مەدەنی (نفوس) و پاراستن، و ئاسانکاری ژ بۆ پێشخستنا شيانان و ئافراندنا دەرفەتێن کار ژ بۆ هاريکاريدانا ب ئارمانجا سەقامگيری و ئاڤەدانکرنا دەڤەرێن رزگارکری ژ دەستێ داعشێ.
هه‌رديسان هاريکاريدانا خەلکێ ژ بۆ ڤەگەرێ بۆ وارێ خوە و ئاڤاکرنا جڤاکێن خوە، بەرنامەيا پێشکێشکرنا مينحەيا دارايی ب رێيا رێکخراوا کۆچبەريا ناڤدەولەتی ڤە ژ بۆ ڤەگەرا دلخوازی کريە کو هەزاران ئێزدی ب سەرکەفتی ڤەگەرن و تێکەل ب جڤاکێن خوە ببن، ژ بلی ڤێ يەکێ دەولەتێن ئێکگرتی يێن ئەمريکايێ ئەڤ يێن ژێرين پێشکێش کرينە،بجهـئينانا 60 پرۆژەيێن ژێرخانێ ل شنگالێ ب كوژمێ 12.5 مليۆن دۆلاران،ئەڤ پرۆژە پێک دهاتن ژ نويکرنا دبستانان، کلينيکێن چاڤدێريا تەندوروستيا بنگەهين و ئيستاسيۆنێن پاقژکرنا ئاڤێ و ناڤەندێن چاندی و خزمەتگوزاريێن بنگەهين يێن دی.
وه چ دەستپێشخەرییەک یان پلانه‌ك هەيە ل داهاتى دا بۆ ئێزديان؟
* دەستپێشخەريکرن د دەستپێکا 66 پرۆژە و چالاکيان دە ژ بۆ باشترکرنا خزمەتگوزاريێن گشتی ل شنگالێ و ب ڤێ يەکێ پشتەڤانيکرن ل 90 دبستانان و 32 بنگەهێن تەندوروستيێ و بەشێن ئاڤ و شارەوانی و کارەبا و چاندنێ و تۆمارکرنا بەلگەيێن مەدەنی (نفوس) و د ڤێ ناڤبەرێ دە پێشکێشکرنا خزمەتگوزاريێن تەندوروستی و دەروونی جڤاکی ژ بۆ دلنياکرن ژ وێ يەکێ کو رزگاربووی دكارن ژيانەکا تەمام و بەرهەمدار د ئاشتيێ دە بژين.
ئه‌مريكا چ بەڵێنه‌كا درێژخایەن هەیە بۆ بەردەوامبوون ل سه‌ر پشته‌ڤانیکرنا ئێزدیان؟
ئەمريکا بەردەوامە د پشتەڤانيکرن و داکۆکيکرنێ دە ل سەر هەزاران خەلکێ شنگالێ د بفەرميکرنا خودانداريا ئەرد و مولکێن وان دە ژ رێيا فەرمانا تايبەت ب ئەردێ ئێزديان ڤە، هەتا مەها حوزەيرانا ڤێ سالێ هەزار و 500 بەلگەيێن مولک و مال ژ بۆ مالباتێن شنگالێ دەرکەتينە و ب ڤێ يەکێ د داويێ دە دان ب مافێ خودانداريا وان هات نياسين کو زێدەتری 47 سالان بوو دهاتە رەدکرن.