ناڤه‌ندا نووچه‌یان – سه‌ما
گەڕا 7ێ یا رووفاتێن ئێزدیان گه‌هشتنه شنگالێ و راده‌ستى مالباتێن وان هاتنه‌كرن وسبه‌ى درێوره‌سمه‌كا تايبه‌ت دا دێ ب گۆڕکرن.
ئيرۆ ئينيێ 21ى شوباتا 2025ێ، پشتی دەركەفتنا ئەنجامێن پشكنینا DNA،گه‌ڕا هه‌فتێ يا 32 رووفاتێن ئێزدیان ل نۆژداريا پزيشكى ل مووسلێ بۆ مۆنۆمێنتا جینوسایدا ئێزدیان ل شنگالێ هاتنه ڤه‌گه‌ڕاندن و راده‌ستى كه‌سوكارێن وان هاتنه كرن.
ژ وان 32 ڕووفاتان، 22 یێن خەلكێ گوندێ كۆچۆنە، ئەوێن دیژی خەلكێ قنێ و سنوونێ و ده‌ڤه‌رێن دى يێن شنگالێ نه و دو ژ وان رووفاتان ژنن.
برياره سبه‌ى ڕۆژا شه‌مبوويێ 22ى شوباتێ، 22 رووفاتێن قوربانيان و ل گوندێ كۆچۆ و 10 رووفاتێن دى ل ده‌ڤه‌رێن دى يێن شنگالێ درێوره‌سمه‌كا ئۆلى دا و ب ئاماده‌بوويان كه‌سوكارێن قوربانيان و كه‌سايه‌تيێن ئێزديان بێنه گۆڕكرن.
تيرۆرستێن داعشێ قوربانيێن ئێزدى ل 3ى ته‌باخا 2014ێ پشتى گرتين د گۆڕێن بكۆم دا گوله‌بارانكرن و پشتى رزگاركرنا شنگالێ ل سه‌ر ده‌ستێ هێزێن پێشمه‌رگه‌ى رووفاتێن وان دناڤ گۆڕان دا هاتنه ديتن و ره‌وانه‌كرن بۆ نۆژداريا پزيشكى ل به‌غدايێ.
هێشتا زێده‌تر ژ 500 رووفاتێن دى یێن ئێزدیان ل بەغدایێ نە، ژبەر نەبوونا سەمپلان هێشتا DNA بۆ هندەکان نەهاتییەکرن.
ل گۆڕه‌ى ئاماران نێزيكى 93 گۆرێن ب كۆم ل شنگالێ هەنە و هندەک ژ وان نه‌هاتینە هلدان.