سه‌ما
گرنگيپێده‌ره‌كا كاروبارێن ئێزديان دبێژت، ب رێيا حكومه‌تا هه‌رێما كوردستانێ ب هه‌زاران گرتيێن ئێزدى ژ ده‌ستێن داعشێ هاتينه ڕزگاركرن، دخوازيت پێكۆلێن زێده‌تر بێنه كرن بۆ ئاشكراكرنا چاره‌نڤيسێ گرتيان.
ل رۆژا چارشه‌مبوويێ 21ى ته‌باخا 2024ێ، د.نه‌غه‌م نه‌وزاد گرنگيپێده‌را كاروبارێن ئێزديان و چاره‌سكارا كچ و ژنێن ڕزگاربووى بۆ سه‌ما گۆت: هێشتا گرتيێن ئێزدى دناڤا ده‌ستێن تيرۆرستێن داعشێ دا ماينه، حكومه‌تا عيراقێ چ پێنگاڤێن ب رژدى و ليژنه بۆ رزگاركرنا وان پێكنه‌ئيناينه، تاكه لايه‌ن خۆ ل رزگاركرنا گرتيان كريه خودان ب تنێ حكومه‌تا هه‌رێما كوردستانێ بوويه.
گۆت ژى: نڤيسينگه‌ها رزگاركرنا ره‌ڤانديان ل هه‌رێما كوردستانێ ڕۆله‌كێ باش و گرنگه گێرايه بۆ رزگاركرنا گرتيێن ئێزدى، هيڤيخوازين ل سه‌ر پێكۆلێن خۆ دبه‌رده‌وام بن.
ل 3ى ته‌باخا 2014 پشتى داگيركرنا شنگالێ ژ‌لايێ تيرۆرستێن داعشێ، 6417 كه‌سێن ئێزدى ژ كچ و ژن و زه‌لام و زارۆكان هاتنه گرتن و ل بازاران دا كرين و فرۆتن ب كچ و ژنان كرن.
لدووڤ داوى ئامارا نڤيسينگه‌ها رزگاركرنا ره‌ڤانديان، 3576 گرتيێن ئێزدى هاتينه ڕزگاركرن و 2601 كه‌س ماينه و بێ سه‌ر و شوونن.