كوردستان 24:
دادوەرەكێ لێكۆلینێ ل دادگەها پاریسێ بڕیارا دادگەهكرنێ بۆ وەلاتیەكێ فەرەنسی دایە، كو توهمەتا تاوانا كۆمكوژیا ژنێن ئێزدی لێ هاتیە دان.
ل رۆژا چارشەمبوويێ، 9ى تشرینا ئێكێ 2024، دادوەرەكێ لێكۆلینێ ل بەشێ تاوانێن دژی مرۆڤایەتیێ ل دادگەها پاریسێ فەرمان دا ب دادگەهكرنا سەبری سەید، كو ئێك ژ چەكدارێن رادیكال بوو و ل ساڵا 1984ـێ ل باژێرێ تۆلۆزێ یێ فەرەنسا هاتیە دنیایێ.
دادوەری د لێكۆلینێن خوەدا ئاماژە ب وێ چەندێ كریە، سەبری سەید كو گومان دهێتە كرن كو ژ ساڵا 2018ـێ ڤە ل سوریا هاتیە كوشتن، د ناڤبەرا سالێن 2014 – 2016دا، تاوانێن دژی مرۆڤایەتیێ ل سوریا كرینە، ب شێوەیەكێ كو ل گۆر بەلگەیێن بەردەست، چار ژنێن ئێزدی و حەفت زارۆك ب دەستێ وی بوینە قوربانی.
ل گۆر بەلگەیان سەبری سەید رەفتارێن وی وەكی رەفتارێن نەمرۆڤانە یێن رێكخراوا داعش بوینە، ب تایبەت كڕین و فرۆتنا ژن و كەچ و زارۆكێن ئێزدی و دەستەسەركرن و ب كۆیلەكرن و دەستدرێژیكرنا سەر وان.
سەرەڕای كو دەنگۆیا كوشتنا وی تۆمەتباری هەیە، لێ ژبەر كو بەلگەیێن مرن و كوشتنا وی نینن، لەوما دادگەها پاریسێ دشێت ب شێوەیێ “غیابی” دادگەهـ بكەت.