ناڤەندا نووچەیان – سەما
ئه‌ندامه‌كێ جڤاتا ئێزديێن سووريێ ئاماژێ ب وێ چه‌ندێ دكه‌ت، پشتى ژناڤچوونا رژێما به‌شار ئه‌سه‌دى، هنده‌ك لايه‌نێن دى دياربووينه و بناڤێ ئێزديان بۆ به‌رژه‌وه‌نديێن خۆ كار دكه‌ن.
شه‌مبوويێ 18ى كانوونا دووێ 2025ێ، كندال ره‌مۆ، ئه‌ندامێ جڤاتا ئێزديێن سووريێ بۆ سه‌ما گۆت: ” ره‌وشا سووريێ هێشتا يا ئالۆزه و پێخه‌مه‌ت گه‌هاندنا داخوازيێن ئێزديان، شانده‌كێ جڤاتێ ل ماوێ چه‌ند ڕۆژێن بۆرى دا سه‌ره‌دانا ديمه‌شقێ كر و ل گه‌ل چه‌ند سه‌ركرده‌يێن ديار يێن ده‌سته‌يا ته‌حرير شام كۆمبوون و ديدارێن ئه‌رێنى ئه‌نجامدان”.
ته‌كه‌زكر، پشتى نەمانا رژێما ئەسەدی و دەستپێکرنا دەستهەلاتا ئەحمەد شەرعی، جڤاتا ئێزديێن سووريێ تاكه سازى بوويه ژ روويێ سياسى ڤه كار ل سه‌ر گه‌هاندنا داخوازيێن ئێزديان كرى و ل رێزێن پێشيێ بوويه بۆ خزمه‌تكرنا جڤاكا ئێزدى.
هه‌روه‌سا دبێژت:” نوكه هنده‌ك لايه‌نێن دى يێن ئێزديان دياربووينه و ئه‌ڤ ره‌وشا نوكه يا سوووريێ بخۆ ب ده‌ليڤه ديتيه و ئه‌و ب تنێ بۆ به‌رژه‌وه‌نديێن خۆ كار دكه‌ن و خزمه‌تا ئێزديان ناكه‌ن”.
هيڤى و داخوازيێن ئێزديان ئه‌ون د ده‌ستوورێ نوو يێ سووريێ دا مافێ وان دپاراستى بن و ئه‌و كه‌سێن بنپێكارى ل دژى ئێزديان كرين بێنه سزادان.