سه‌ما
وه‌كيلێ ميرێ ئێزديان ئاماژێ ب وێ چه‌ندێ دده‌ت،گرنگه ئێزديان لۆبيه‌كێ ئێكگرتى دچارچۆڤێ كوردستانێ دا ل سه‌ر ئاستێ نێڤ ده‌وله‌تى هه‌بت بۆ به‌رژه‌وه‌نديا ملله‌تێ خۆ كار بكه‌ت.
جه‌هوه‌ر عه‌لى به‌گ،وه‌كيلێ ميرێ ئێزديان بۆ كاروبارێن په‌يوه‌نديان،ئيرۆ ئێك شه‌مبوويێ 11ى ته‌باخا 2024ێ بۆ سه‌ما راگه‌هاند؛ مير حازم ته‌حسين به‌گ، ميرێ ئێزديان به‌رده‌وام سه‌ره‌دانا وه‌لاتێن جيهانێ دكه‌ت،ژبۆ خورتكرن و پێشڤه‌برنا په‌يوه‌نديان دگه‌ل جڤاكا نێڤ ده‌وله‌تى.
ديار ژى كر، چه‌ندين وه‌لات و ده‌سته‌يان ژوانژى هه‌رێما كوردستانێ دانپێدان ب جينۆسايدا ئێزديان كريه، هه‌ڤسۆزيا خۆ دياركرن ب تايبه‌ت پشتى جينۆسايدا 2014ێ يا بسه‌رێ ئێزديان دا هاتى ل سه‌ر ده‌ستێ داعشێ،ئه‌م دگه‌ل هندێ نه لۆبيه‌كێ بهێز بۆ ئێزديان دچارچۆڤێ كوردستانێ دا ل ده‌رڤه بێته دروستكرن و بۆ به‌رژه‌وه‌ندى و خزمه‌تا ئێزديان كار بكه‌ن.
تيرۆرستێن داعش ل ڕۆژا 3ى ته‌باخا 2014ێ ئێزدى جينۆسايدكرن، زێده‌ترى هه‌زار وه‌لاتيێن ئێزدى هاتنه كوشتن و 6416كه‌س هاتن گرتن، هێشتا ب هه‌زاران خێزانێن خه‌لكێ شنگالێ ل كه‌مپان و ژ ده‌رڤه‌ى كه‌مپاندا ئاواره‌نه.
ئێزدى هيڤيخوازن جڤاكا نێڤ ده‌وله‌تى پێنگاڤێن زێده‌تر بهاڤێژن بۆ ناساندنا جينۆسايدێ و ئارامى و ته‌ناهى ل ده‌ڤه‌رێن وان به‌رقرار ببت، داكو جاره‌كا دى ب سه‌ربلندى ڤه‌گه‌رنه سه‌ر زێدێ خۆ.