ناڤەندا نووچەیان – سەما
وەزارەتا پێشمەرگەی ڕاگەهاند، شەڤا دەربازبووی ب ڕێیا سێ درۆنێن بۆمبڕێژکری کو ژ ئالیيێ ئیرانێ ڤە ئاراستەی سنوورێ هەولێرێ هاتبوونە کرن، مالا پێشمەرگەیەکێ ب ناڤێ (مووسا ئەنوەر) هاتە ئارمانجکرن، کو مخابن ئهو و هەڤژینا وی شەهیدبوون.
د ڕاگەهاندنا وەزارەتا پێشمەرگەى يا حكومهتا ههرێما كوردستانێ دا هاتییە: شەڤا دەربازبووی، 6ـی نیسانا 2026، ب ڕێیا دوو درۆنێن بۆمبڕێژکری کو ژ لایێ گرووپێن تیرۆرستی یێن ژ یاسایێ دەرکەفتی ڤە هاتبوونە ئاراستەکرن، ئێرش کرە سەر بارەگهههكێ هێزێن پێشمەرگەی ل سنوورێ ئیدارەیا راپەڕین. ئاماژە ب وێ چەندێ ژی کر کو هەر هەمان شەڤ، ب ڕێیا سێ درۆنێن بۆمبڕێژکری کو ژ ئیرانێ ڤە ئاراستەی سنوورێ هەولێرێ هاتبوونە کرن، مالا پێشمەرگەیەكى ب ناڤێ (مووسا ئەنوەر) هاتە ئارمانجکرن، کو ب داخەکا گران ڤە ئهو و هەڤژینا وی شەهید بوون.
وەزارەتا پێشمەرگەی بەحسێ وێ چەندێ ژی کر، ئەڤ دەستدرێژییە بەردەوامییا وێ زنجیرە ئێرشێن تێکدەرانەیە یێن کو دئێنە سەر بارەگههێن هێزێن پێشمەرگەی و دەڤەرێن ئاکنجیبوونێ ل هەرێما کوردستانێ. ڕاگەهاند ژی کو زێدەباری دەربڕینا پرسە و سەرەخۆشیێن خۆ یێن کوور بۆ کەسوکار و بنەمالێن سەربەرزێن شەهیدان، دوپات دکەین کو خوونا شەهیدێن مە ب هەروە ناچت.
دوپاتكر، جارەکا دی بەرپرسیارەتییا ڤان بۆمبهبارانان دێ ئێخینە ستۆیێ کۆمارا ئیسلامی یا ئیرانێ و گرۆپێن چەکدار یێن ژ یاسایێ دەرکەفتی ل عێراقێ.
هەروەسا ڕاگەهاند، ل سەر فەرماندەیێ گشتی یێ هێزێن چەکدارێن عێراقێ پێدڤییە ئەرکێن خۆ یێن یاسایی، ئەمنی و دەستووری جێبەجێ بکەت و سنوورەکێ بۆ ڤان ئێرش و بۆمبهبارانان دانێت.