ناڤەندا نووچەیان – سەما
مەسرور بارزانی، سەرۆكێ حكومەتا هەرێما كوردستانێ ل هەشتەمین ساڵیادا ڕیفراندۆمێ دبێژت: ڕیفراندۆم بڕیارەكا ب وێرەك یا گەلێ كوردستانێ بوو و ڕۆژا سەركەفتنا ئیرادەیا نەتەوەیی بوو.
ئیڕۆ پێنج شەمبوویێ، 25ـی ئەیلوولا 2025، مەسرور بارزانی، سەرۆكێ حكومەتا هەرێما كوردستانێ، پەیامەك ب هەڵكەفتا هەشتەمین ساڵیادا ڕیفراندۆمێ بەڵاڤكر.
د پەیاما سەرۆكێ حكومەتێ دا هاتییە “یادا ساڵڕۆژا ڕیفراندۆمێ، ڕۆژا بڕیارا ب وێرەك یا گەلێ كوردستانێ، ڕۆژا سەركەفتنا ئیرادەیا نەتەوەیێ مە، ڕۆژا هیڤی و ئۆمێدان، ل سەركردە و ڕابەر و پێشمەرگە سەرۆك بارزانی و بنەماڵێن سەربەرزێن شەهیدان و پێشمەرگەیێن قەهرەمان و گەلێ نیشتیمانپەروەر و خۆڕاگرێ كوردستانێ پیرۆز بت.”
ڕیفراندۆم وەرچەرخانەکا بنەرەتی بوو د بزاڤا خەباتا گەلێ کورد دا
ل 25 ئەیلوولا سالا 2017، دیرۆك ب دهستێن مهرجهعێ كوردان سهرۆك بارزانی هاته توماركرن، ئهڤرۆ ژی ب شانازی و سەربلندی ڤە گەلێ كورد یادا هەشتەمین يا سالیادا ڕیفراندوما مێژوویی ساخ دکەنەڤە.
ئەڤ ڕوودانا مەزن وەرچەرخانەکا بنەرەتی بوو د بزاڤا خەباتا مللەتێ مە دا بەرەف ئازادیێ، کەرامەت و مافێ چارەنڤیس سازدا، ڕیفراندوم ب تنێ پرۆسهیهکا هەلبژارتنان نەبوو، بەڵکو دەڕبرینەکا ڕاستگوویانەیا ئیرادەیا نەتەوەیەکێ بوو و پەیامەکا ڕوون و ئاشکرا بوو بۆ هەموو جیهانێ کو ئیرادەیا مللەتێ مە ناهێتە شکاندن و ئارەزوو و هیڤی یا مە یا ڕەوا بۆ ئازادی و کەرامەتێ هەردەم ب نەمری دێ مینیت.
ریفراندوما 25ی ئەیلوولێ بەرهەمێ سەرکردایەتیەکا مێژوویی یا ژێرانە و ب وێرانە یا رێبەرێ مللەتێ کورد سەرۆک مەسعود بارزانی بوو، کو ب وێری و بەرپرسیاری ئەڤ پرۆژێ نەتەوەیی یێ مەزن هەلگرتی، ئیرادەیا گەلێ کورد بەرجەستە کر و ب ئازایەتیەکا بێ وێنە دەڕبڕین ژێ هاتە کرن، دا خەونێ بکەتە واقعەکێ بەرجەستە کری و بۆ جیهانێ دووپات بکەت کورد خودانێ بریار و چارەنفیسێ خۆنە و پاشەکەشێ ژ مافێن خۆ یێن ڕەوا نهكهت و ناڤێ سەرۆک مەسعود بارزانی بۆ هەتا هەتایێ ب ڤێ ڕۆژا نەمر ڤە دێ هێتە گرێدان، وەک هێمایێ ب وێر و ئیرادەیا ئازاد.