ناڤەندا نووچەیان – سەما
ئيرۆ پێنج شەمبووێ 5ى شووباتا 2026ێ، ب بەرهەڤبوونا سەرۆک مەسعود بارزانی ل هەولێرێ یازدەهەمین کۆنگرەیێ ساخلەمییێ یێ مۆزۆپۆتامیا ل ههولێرێ دەستپێکر. د کۆنگرەیى دا کو ب بەشدارییا نۆشدارێن هەر چار پارچەیێن کوردستانێ و نۆشدارێن دیاسپۆڕایێ ب ڕێڤەچوو، سەرۆک بارزانی گۆتارهك پێشکێشکر و د پەیڤا خۆ دا سوپاسییا سەندیکایا نۆشدارێن کوردستانێ و بۆردێ میزۆپۆتامیایێ کر ژ بۆ ڕێکخستنا یازدەهەمین کۆنگرەیا وان و هیڤیيا سەرکەفتن و بەردەوامیێ بۆ خواست.
سەرۆک بارزانی ئاماژە ب وێ یەکێ ژی دا کو دەرگەهێ هەولێرێ هەردەم بۆ وان جۆرە چالاکیان یێ ڤەکری یە و ب سوپاسی ڤە دیارکر کو ئەڤ جۆرە چالاکیە ب بهانە و ئەزموونەکن بۆ پاشەڕۆژێ خزمەتێ ب ملەتى دکەت، هەروەسا سەرۆک بارزانی تیشک ئێخستە سەر ئەرکێ نۆشداران و ب ئەرکەکێ پیرۆز وەسف کر کو پاراستنا گیانێ مرۆڤانە.
سەبارەت ب بارودۆخێ سیاسی و ب تایبەت ڕۆژئاڤا، سەرۆک بارزانی دیارکر کو مە دیت خەریک بوو کارەساتەکا مەزن ڕووبدەت و ببیتە شەڕێ دو نەتەوەیان، هەروەسا سەرۆک بارزانی ئاشکرا کر کو ترس هەبوویە ژ وێ یەکێ شەڕێ کورد و عەرەبان ڕووبدەت و کارەسات ب دووڤ دا بێت. سەرۆک بارزانی ب زڤرین بۆ مێژوویێ بەحس ل وێ یەکێ کر کو کورد چ جارەکی دەستپێشخەر نەبوویە بۆ شەڕی و دیار کر: “مە چ ژ دەست هات، مە کر” و هیڤی خواست کو ڕێکكەفتنا برایان ل ڕۆژئاڤا و حکومەتا سوریایێ بەردەوام بت.
سەرۆک بارزانی سوپاسییا تاک ب تاکێ خەلکێ کوردستانێ کر بۆ وێ ئێکڕێزییا نەتەوەیی یا کو د ڤی پرسی دا ئەنجام دای و ب سەرکەڤتن وەسف کر، هەروەسا سوپاسییا خەلکێ کوردستانێ و دەزگەهـ و ئالييێن پەیوەندیدارێن حکومەتا هەرێمێ کر بۆ کۆمەک و هاریکاریکرنا خوشک و برایێن ڕۆژئاڤا. سەرۆک بارزانی د پەیڤا خۆ دا ئەو یەک ژی دیار کر کو نابت هزر ل شەڕی بێتە کرن، بەلێ زۆردارییا زۆرداران ژی قەبوول ناکەین.
ل دۆر پرۆسەیا ئاشتیيێ ل باکوور، سەرۆک بارزانی ئاماژە ب وێ یەکێ دا کو ژ ڕۆژا ئێکێ پشتەڤانی ل پرۆسەیا ئاشتیێ کریە و پشتەڤانیێ لێ ژی دکەت و هیڤی خواست کو بگەهتە ئەنجامەکى کو خێر بۆ هەموو ئاليهكى تێدا بت. ل داویێ سەرۆک بارزانی ل سەر چەند پرسێن دی ئاخفت.