سێ ساڵ ل سەر وەغەرکرنا نڤيسكار و ڕه‌وشه‌نبير”فەهمی حەسەن” دەرباز دبن
مامۆستا و نڤیسەر و راوێژکارێ جڤاتا روحانی یا ئێزدیا و پێشمەرگەیێ شۆرەشا گولانێ،ناڤێ ویێ دورست فەهمی حەسەن عەمەرە یێ ناسیار بوو بـ(فەهمی بابێ رۆژانێ) ل سالا ١٩٥٢ ل گوندێ کەورێنیێ ل دەڤەرا سلێڤانیا ل قەزا زاخۆ ژ دایک بوویە، بەلێ ژ بەر شۆرەشا ئەیلولێ و هەستێ نەتەوەی چەندین جاران دگەل مالباتا خوە ئاوارەی شنگال و شێخان و باعەدرێ بوویە و بۆ جارا تالیێ ل باعەدرێ ئاکنجی بوویە.
فەهمی حەسەن خواندنا خوەیا سەرەتایی ل دێرەبوونێ و گۆهبەل خووندیە و ته‌مامکریە و خووندنا خوەیا ناڤنجی ل شێخان و شنگال ته‌مامکریە و یا ئامادەیی ل موسل خوەندیە.
دبیاڤێ مامۆستایێ دە مامۆستایەکێ تژی ژ خزمەت بوو بۆ جارا یەکێ و بۆ دەمێ شەش هەیڤا ل باژارێ بەغدا بەشداری د خۆلەکا بەرهەڤکرنا مامۆستایان دە کرییە و ل سالا ١٩٧٧ بوویە مامۆستا و ٣٨ سالێن خزمەتا مامۆستایێ هەنە و گەله‌ک جاران بوویە رێڤەبه‌ر و دبتە سەرپەرشت ل پەروەردا قەزا شێخان بۆ دەمێ یازدە سالان و هەروسان راوێژکارێ جڤاتا رۆحانیا ئێزدیان بوو.
چەندین باوەرنامە هەبوون ژ وانژی دەرچوویێ کولیژا پەروەردا گشتی ل زانکۆیا سانت کلیمینتس یا بریتانی و ماستەر ب دەرونزانیا پەروەردێ ل زانکۆیا سانت کلیمینتس یا ئازاد هەبوویە،هەروسا بوویە پێشمەرگە ل شۆرەشا گولانێ و ب گرانی بریندار دبت.
د ئالیێ نڤیساندن و رۆژنامەڤانیێ دە خزمەتەکا بەرفرەهـ کرییە و د هەر جهەکی دە جهێ خامەیێ وی لێ دیارە ژ کارێن وی یێن رۆژنامەڤانیێ بۆ نموونە:ـ
_بتر ژ دەهـ سالا پەیامنێر بوویە ل رۆژناما پەیمان و ئەڤرۆ.
_ئەندامێ سەندیکا رۆژنامەڤانێن کوردستانێ لقێ دهۆک بوویە.
_بەرپرسێ پشکا کوردی بوو ل رۆژناما دەنگێ لالش بۆ دەمێ چار سالان.
_ئێكه‌م سەرۆکێ بنگەهێ لالش تایێ باعەدرێ بوو.
_سەرنڤیسەرێ ئێکەم گۆڤار ل باعەدرێ بوویە بناڤێ سلاڤگەها لالش و دیسان ژی بەرپرسێ دەزگەهێ دم دم تایی باعەدرێ بوو.
د ئالیێ کارێ رێکخراوان دە ژی یەک ژ دامەزرێنەرێن رێکخراوا ئەلند بو بۆ دیموکراسیکرنا گەنجان ل دهۆکێ.
د ئالیێ نڤیساندنێ دە چەندین راپۆرت و ڤەکۆلین ل دۆر ئێزدیاتیێ و نەتەوا کورد و دیرۆکا کەڤن یا کوردی د رۆژنامە و گۆڤارێن دەڤەرێ دە بەلاڤکرنە و وەشاندنە ژ وانژی(لالش،مەحفەل،پەیڤ،ئاسۆیێ پەروەردە،دەنگێ پێشمەرگە،نور لالش،چرایێ لالش)…هتد.
و چەندین پەرتووک چاپ و بەلاڤکرنە ژ وانژی:
١.دەولەتا کوردی بەری زاینی،میتانی و هوری وەک نموونە.
٢.ئێزدیاتی پاشمایێ میترایێ نە.
٣.ئێزدی و زەردەشتی د هەڤسەنگیا دیرۆکێ دە.
٤.ئۆلێن دێرینێن میزۆپۆتامیا و زاگرۆسیان.
٥.طرق التدريس و أثرها على نسب النجاح(ب زمانێ عرەبی).
بەلێ ب مخابنی ڤە ژ بەر نەخۆشیا وی یا بەردەوام ل رۆژا ٤/٧/٢٠٢١ ل وەلاتێ ئەلمانیا دلێ وییێ مەزن و تژی ژ رەوشەنبیری ژ لێدانێ سەکنی و وەغه‌را داويێ کر.
تێبینی:زانیاری ژ سێ پەرتوکێن خودێ ژێ رازى هاتينه وەرگرتن و ڤەگوهاستن.