سه‌ما
نڤيسكاره‌كێ ئێزدى ئاماژێ ب وێ چه‌ندێ دده‌ت، جینۆسایدا ئێزدیان دەربازی قوناغا ژبیرکرنێ دبت و فۆکسا نێڤدەولەتی کێمبوویە، ژبەرکو روودانێن جیهانی یێن نوو په‌یدابوون، زیانەکا مەزن ب کەیسا ئێزدیان گەهشتییه.
ل رۆژا شه‌مبوويێ 24ى ته‌باخا 2024ێ، نڤیسكارێ ئێزدی خێری ابراهیم كۆرۆ بۆ كه‌نالێ سه‌ما دیاركر، پشتی جینوسایدا ئێزدیان ل 3/8/2014 نڤێسەر و ره‌وشەنبیرێن ئێزدیان تا ڕادەیەکی باش کارینە ئێش و ئازارێن ئێزدیان بگەهیننە جڤاکا نێڤدەولەتی و جهێن شۆلەژێ ،ژوانژی ديکيۆمێنتکرن و نڤيسین ل سەر کەیسا ئێزدیان ڕۆلەکێ گرنگ هەبوویە د ديکیۆمێنتکرنا وان تاوان و نەهامەتێن ب سەرێ ئێزدیان داهاتین، هەروەسا ب سەدان پەرتۆک و ڤەکۆلین و گۆتار ل سەر جینۆسایدێ نڤيسینە و ب چەندین زمانان بەلاڤبووینە، ڤێ چەندێ ژی ل سەر کەیس و ڕەوشا جڤاکێ ئێزدی هشیاریەکا نێڤدەلەتی پەیداکرییه.
هه‌روه‌سا خوياكر، ره‌وشەنبیرو نڤيسەر و چالاکڤانێن ئێزدیان پشکداری د چەندین کۆنفرانس و کۆمبونێن نێڤدەولەتی دا کرینه، ژوانژی سازیێن نەتەوه‌يێن ئێكگرتی و رێکخراوێن مافێ مرۆڤی و ب بەلگە بەحسا جینۆسایدا ئێزدیان کرینە و دەنگێ ئێزدیان گەهاندینه جڤاکا نێڤدەولەتی.
ده‌رباره‌ى راکێشانا فۆکسا میدیایى بۆ کەیسا ئێزدیان گۆت: ره‌وشەنبیرێن ئێزدى ڕۆلەکی مەزن گێرایه د بەرهه‌م ئینانا ژمارەیه‌کا باش یا پارچه ڤیدیۆ و فلمێن ديکیۆمێنتاری، کو بووینه بەلگە ل سەر جینۆسایدا ئێزدیان، زێده‌بارى پشکداری د سەدان به‌رنامێن ته‌له‌فزیۆنی دا بووينه وکارینە تا ڕادیەکی باش فۆکسا میدیایی بده‌نه سه‌ر ڕەوشا جڤاکێ ئێزدی.
د بەردەوامیا ئاخفتنێن خۆدا دیار ژى كر، ب مخابنیڤە دبێژین پشتی دەربازبوونا دەهـ سالان و سەرەرایی وان هەموو کارێن مەزن یێن هاتینە کرن، ئەم وەسا هەست دکەین جینۆسایدا ئێزدیان یا دەربازی قۆناغا ژبیرکرنێ بووی و فۆکسا نێڤدەولەتی یا ل سەر کێم دبت، ژبەرکو بەردەوام هندەک روودانێن دن یێن جیهانی پەیدا دبن و فۆکسا جڤاکا نێڤدەولەتی رادکێشن و ڤێ چەندێ ژی زیانەکا مەزن ب کەیسا ئێزدیان گەهاندیە وکریه بابەتەکێ لاوەکی.
خێری ابراهیم دبێژت:ل سەر نڤيسەر و ره‌وشەنبیر و چالاکڤانێن ئێزدی پێدڤییه بەردەوامیێ بده‌نه ديکیۆمێنتکرن و نڤيسین و چێکرنا فلمێن ديکیۆمێنتاری وکۆمکرنا بەلگەیان ل سەر جینۆسایدێ و کارکرن ل گەل سازیێن نێڤدەولەتی و بەشداریکرن ل کونفرانس و بەرنامان دا، داكو فۆکسەکا باش بێتە ئێخستن ژ بۆ ئەنجامدانا ڤان کاران ئه‌وژی رزگارکرنا ب سەدان خوشك و دایکێن مە یێن هێشتا د دەستێن تیرۆرستێن داعشێ دە ماین، ڤەکرنا هەموو گۆڕێن ب کۆم و جهـ وشوونوارێن وان گۆڕان بێنه پاراستن وەک بەلگە ل سەر تاوانێن داعشێ.
ناڤهاتى دا زانين ژى: پشتی چەندین وەلاتان دانپێدان ب جینۆسایدا ئێزدیان كرى، کارکرن ل سەر دانپێدانا نەتەوه‌يێن ئێکگرتی خاله‌كا گرنگه، هه‌روه‌سا پێدڤیه جینۆسایدا ئێزدیان د پرۆگرامێ خواندنێ دا جهێ خوە بگرت ل هەرێما کوردستانێ و عیراقێ.