نڤيسينگه‌هه‌كا عه‌رد و خانيا:ل شاريا خانى بده‌ست ناكه‌ڤن و نه‌ماينه
سه‌ما
گه‌له‌ك ژ ئاواره‌يێن ل كه‌مپا شاريا و ده‌رڤه پشتى كوژمێ 4 مليۆن ديناران ل هه‌مبه‌رى ڤه‌گه‌ريانێ بۆ شنگالێ وه‌ردگرن نازڤرن ڤه و ل كۆمه‌لگه‌هێ دمينن،خودانێ نڤيسينگه‌هه‌كا عه‌رد و خانيا ژى دبێژت:خانى نه‌ماينه.
ل گۆڕه‌ى زانياريێن سه‌ما،پشتى بريارا دائێخستنا كه‌مپان ژلايێ حكومه‌تا عيراقێ ڤه هاتيه دان گه‌له‌ك ژ ئاواره‌يێن شنگالێ ل كه‌مپا شاريا و ده‌وروبه‌ران،نازڤرن شنگالێ ڤه دڤێن ل كۆمه‌لگه‌هێ بمينن ژبه‌ر جۆگرافيا ده‌ڤه‌رێ.
خالد عه‌بدۆ،خودانێ ئێك ژ نڤيسينگه‌هێن كرين و فرۆتنا عه‌رد و خانيا ل كۆمه‌لگه‌ها شاريا مه‌ندهۆش مايه و بۆ سه‌ما دبێژت:ل سنوورێ كۆمه‌لگه‌ها شاريا داخوازيه‌كا زۆر ل سه‌ر كرين و كرێكرنا خانيان هه‌يه،پتريا وان ئاواره‌يێن كه‌مپا شاريا و ده‌وروبه‌رانن،ب جۆره‌كى 60% دڤێن كرێ بكه‌ن و 30%دخوازن بكرن،دنۆكه دا خانى بده‌ست ناكه‌ڤن و نه‌ماينه.
بايز كرێت،رێڤه‌به‌رێ كه‌مپا شاريا يا ئاواره‌يێن شنگالێ بۆ سه‌ما ڕاگه‌هاند،هه‌ر سه‌رۆك خێزانه‌كێ ئاواره ل كه‌مپێ ده‌مێ 4 مليۆن دينارێن به‌خشينه‌يا حكومه‌تا عيراقێ وەر]گرت ئێكسه‌ر دۆسه‌يا وی يا ئاواره‌بوونێ تێتە گرتن و وه‌ك وه‌لاتيه‌كێ ئاسايى ل ده‌رڤه‌ى كه‌مپێ ئێته هژمارتن و بچته چ جهه‌كى يێ ئازاده لێ بژيت.
ل دووڤ بريارا حكومه‌تا عيراقێ ل ده‌مێ ڤه‌گه‌ريانا هه‌ر خێزانه‌كا ئاواره بۆ سه‌ر زێدێ خۆ دێ چار ملیۆن دینار، تەباخ، بەفرگر و تەلەڤزیۆن پێ ئێنه دان.
ژڤانێ دائێخستنا کەمپێن ئاوارەيێن شنگالێ تاكو 31ی ڤێ مه‌هێ يه، تا وى ژڤانى، چار ملیۆن دینار ب هەر خێزانه‌كێ ئێنه دان ڤه‌گەڕته شنگالێ، ئەگەر ل وى ژڤانى کەمپە دانه‌خستن بڕیار دێ چتە بەردەم ئەنجوومەنێ وەزیرێن عيراقێ.
پشتى 31ى تيرمه‌هێ،ئەو ئاوارەیێن ل هەرێما کوردستانێ ڤه‌نه‌گه‌ريابنه سه‌ر زێدی خۆ،وه‌كو ئاكنجيێ وێ ده‌ڤه‌رێ ئێته هه‌ژمارتن،كو كه‌مپه ل وێده‌رێ يه و وەکو ئاوارە مامەڵێ لگەڵدا ناكه‌ن.
16 کەمپێن ئاوارەيان ل سنوورێ پارێزگه‌ها دهۆکێ هەنه،ئەو كوژمێ بۆ ڤه‌گه‌ريانێ هاتيه دان،بتنێ ئەوان ئاواره‌يان ڤەدگرت کو ل ناڤ کەمپاندا دژین.