هەرمان میرزا بەگ:پرۆژێن حکومەتا هەرێمێ بۆ ڕزگاربوویان دێ دبەردەوام بن
سه‌ما
شیرەتکارێ سەرۆکێ حكوومەتا هەرێما كوردستانێ بۆ کاروبارێن پێكهاتێن ئێزدیان ڕاگەهاند، پرۆژێ پشتەڤانیا دارایی یا حکوومەتا هەرێما کوردستانێ بۆ ڕزگاربویێن دەستێ داعشێ، خزمەتەکا مەزنە بۆ وان ڕزگاربوویان دئێته كرن.
هەرمان میرزا بەگ، شیرەتکارێ سەرۆکێ حكوومەتا هەرێما كوردستانێ بۆ كاروبارێن ئێزدیان بۆ سه‌ما دياركر، مەسرور بارزانی، سەرۆکێ حکومەتا هەرێما کوردستانێ هەردەم پشتەڤان و پالپشتی یا مەزنا ئێزدییانە و هەرگیز ماندی نەبوویە بۆ هەموو پێکهاتان، ئەڤ پرۆژە ژی دێ بتە پشتەڤانەکێ مەزن بۆ هەموو ئێزدییان و ب تایبەتی ژی بۆ ڤان ڕزگاربوویان، ژبەرکو ڤان ڕزگاربوویان پێتڤی ب ژیانەکا سەرفرازانە هەیە.
زەلال ژی کر، زێدەتر ل سێ هه‌زار کەسان ب ڕێيا بنگەهێ لالش یێ ڕه‌وشه‌نبیری و جڤاکی دێ ڤی کوژمێ دراڤى وەرگرن كو هاتیە تەرخانكرن، دگەل وێ ژی دا پرۆژێن حکوومەتا هەرێما کوردستانێ بۆ ڕزگاربوویێن دەستێ داعشێ دێ دبەردەوام بن.
ئاماژە بۆ وێ چه‌ندێ دا حکومەتا هەرێما کوردستانێ و سەرۆکێ حکوومەتێ بخۆ، هەردەم د خەما ئێزدییاندانە و ب تایبەت بۆ شنگالێ چەندین پرۆژە ل داهاتیدا هەنە، بۆ چارەسەرییا دەروونی یا ڕزگاربوویان، هەروەسا پرۆژە ژی هەیە بۆ وان کەسێن ل خواندنێ هاتینە ڤەقەتیان و چارەسەری دێ بۆ وان ڤەبینت.
شیرەتکارێ سەرۆکێ حکوومەتێ دوپاتكر،حکومەتا هەرێما كوردستانێ دێ پشتەڤانیا وێ کەت كو ڕێککەفتنا شنگالێ وەک خۆ بێتە جێبەجێکرن، بۆ هندێ خەلك ب سەرفرازانە دوور ل خۆسەپێنییا هندەک لایەنان، ڤەگەڕنە بۆ زێدێ باب و باپیرێن خۆ.
ل ڕۆژا 2/7/2024ێ،ب بەرهەڤبوونا مەسرور بارزانی، سەرۆك وەزیرێن هەرێما كوردستانێ، ڕێورەسما ڕاگەهاندنا بەرنامێ پشتەڤانیا دارایی بۆ ڕزگاربوویێن دەستێ تیرۆریستێن داعشێ، ل باژێرێ هەولێرێ ب ڕێڤە چوو.
د ڕێوڕەسماندا مەسرور بارزانی راگەهاند،ئەڤ ڕێزلێنانە بەخشینەکا هەیڤانەیە بۆ زێدەتر ژ سێ هه‌زار خوشکێن ئێزدیێن ڕزگاربوویێن دەستێ داعشێ و بێشک ب باشتربوونا ڕەوشا دارایی، ئاستێ هاریکاریێن مە بۆ ڤان خۆشتڤیان دێ بەرفرەهتر بت.
سه‌رۆكوه‌زيران گۆت ژى دێ هەموو هاریکارییەکێ پێشکێشێ ڤان خوشتڤیا کەین هەتا ژیانەکا شایستە هەبت و پشکەکا بچووك ل برینێن وان ساڕێژ بکەین، ب تایبەت ل دیتنا دەلیڤێن کاری و درێژەدان ب خواندنێ و چارەسەرییا نۆژداری، ل دیف شیانان دێ هەموو ئاسانکارییەکێ بۆ کەین.