بڕیارا دائێخستنا كه‌مپان هاته ڕاوه‌ستاندن
سه‌ما
ڕێڤه‌به‌رێ کۆچ و کۆچبەران و به‌رسڤدانا قەیرانان ل پارێزگه‌ها دھۆکێ ڕاگه‌هاند،بريارا حكومه‌تا عيراقێ بۆ گرتنا كه‌مپان بێ ديراسه‌ت بوو، حكومه‌تا هه‌رێمێ و حكومه‌تا فيدرال دانوستاندن ل سه‌ر ڤێ پرسێ كريه،له‌وا كه‌مپه دێ وه‌ك خۆ مينن.
پير ده‌يان جه‌عفه‌ر، ڕێڤه‌به‌رێ کۆچ و کۆچبەران ئيرۆ 18ى تيرمه‌ها 2024ێ،بۆ سه‌ما گۆت:بڕیارا حکومەتا عيراقێ بۆ ڤه‌گەڕاندنا ئاواران، بڕیاره‌كا بێ دیراسەت بوو، بێ ڕاوێژ ل گەڵ حکومەتا ھەرێما کوردستانێ و ئاوارێن شنگالێ هاتيه دان،ڤێگاڤێ دانوستاندن دناڤبه‌را حكومه‌تا هه‌رێمێ و حکومەتا فيدڕاڵدا هه‌يه و گه‌شبينين ل نێزيك دێ میکانزمه‌كا باشتر بۆ ڤه‌گه‌ريانا ئاواره‌يان هه‌بت.
ئاشكه‌راكر:دنۆكه دا کەمپه دێ وەك خۆ مينن و ئەو بڕیارا حکومەتا عيراقێ يا دائێخستنا كه‌مپان داى هاتيه ڕاوه‌ستاندن.
لگۆره‌ى بريارا وه‌زاره‌تا كۆچ و كۆچبه‌رێن عيراقێ تا 31/7/2024ێ هه‌موو كه‌مپه بێنه دائێخستن و ل هه‌مبه‌ر وه‌رگرتنا چارمليۆن ديناران و هنده‌ك كه‌لوپه‌لێن ناڤ مالێ ئاواره ڤه‌گه‌رنه سه‌ر ده‌ڤه‌رێن خۆڤه.
ل سنوورێ دھۆکێ و ئیدارا سەربەخۆیا زاخۆ 15 كه‌مپه بۆ ئاواره‌يان هاتينه ڤه‌كرن و 95% ئاكنجيێن كه‌مپان خەڵکێ شنگالن.
ل ڕۆژا 3ی ئابا 2014ێ،تیرۆرستێن داعش ھێرش کره سەر قەزایا شنگالێ ل ڕۆژئاڤایێ پارێزگه‌ها نەینەوا و دئه‌نجام دا ژمارەیەکا زۆر يا کوردێن ئێزدی هاتنه كوشتن و برينداركرن ، ھەروەسا ژمارەیەکا دى ژى ئاوارەبوون، ئه‌ڤه سه‌ره‌راى هندێ ب سه‌دان كه‌س هاتنه گرتن و تا نۆكه چاره‌نڤيسێ زێده‌ترى 2هه‌زار كه‌سان يێ ديارنينه.