چیایێ شنگالێ بەرەڤ کەسکاتیێ دچیت؛ چاندنا 400 داران ل مەزارگەهێ “مەلەک فەخرەددین”

ناڤەندا نووچەیان – سەما

ب درووشمێ کەسککرنا شنگال و جهێن پیرۆز، هەوەکا بەرفرەهـ یا چاندنا 400 داران ل مەزارگەهێ “مەلەک فەخرەددین” ل سەر چیایێ شنگالێ دەستپێکر، ئەڤ هەوە ب پشکداریا خلمەتکارێن مەزارگەهی و خەلکێ دەڤەرێ و ب ئارمانجا جوانترکرنا ژینگه‌ها ڤی جهێ پیرۆز دهێتە ئەنجامدان.

ژ وێرانکاریێ بۆ ئاڤەدانیێ

پیر عومەر خێرێ، ئێک ژ خلمەتکارێن گرۆپێ خاتوونا فه‌خران، بۆ کەنالێ سەما ڕاگەهاند: “ل سەردەمێ هێرشێن تیرۆرستێن داعش ل سالا 2014ێ، ئەڤ مەزارگەهە هاتبوو پەقاندن و وێرانکرن، لێ ب خێرا خودان خێر و خەلکێ مەیێ دڵسۆز، مەزارگەهـ دووبارە هاتە ئاڤاکرن، ئیرۆ ژی خلمەتکارێن خاتوونا فەخران وەک قۆناغەکا نووی یا خزمەتێ، دەست ب چاندنا داران کریە.”

پیر عومەر زێدەتر گۆت: “د قۆناغا ئێکێ دا ئیرۆ مه‌ 200 دار چاندن، و بڕیارە ل هەفتیا بهێت ژی 200 دارێن دی ل دەوروبەرێ مەزارگەهی بچینین، مه‌ره‌ما مه‌ ژی ژینگه‌ها دەڤەرێ کەسک و ئاڤەدان ببت.”

پەیاما ژینگەهپارێزیێ

د هەمان دەم دا، صەلاح حەسەن، ئەندامێ گرووپێ مەزارێ خاتوونا فەخران، ئاماژە ب گرنگیا ڤێ پێنگاڤێ بۆ كه‌نالێ سه‌ما کر و گۆت: “مە ب فەر زانی وەک ئەرکەکێ ئاینی و جڤاکی پشكداریێ د ڤێ هەوێ دا بکەین، داخوازا مە ژ سه‌ردانكاران ده‌ما سه‌ره‌دانا ڤی جهێ پیرۆز دكه‌ن چاڤێ وه‌ ل ڤان داران بت و بپارێزن و ئاڤ بدەن، پاراستنا ژینگه‌ها مەزارگەهی ژی ب خۆ خزمەتەکا مەزن و پیرۆزە.”

کورتەیەک: ئەڤ پڕۆژەیە نیشانا وێ چەندێ یە کو جڤاکێ ئێزدی ل شنگالێ، سەرەڕای برینێن شەر و وێرانکاریێ، بەردەوامە د ئاڤاکرن و گەشەپێدانا ده‌ڤه‌را خۆ دانه‌.