سفيان يوسف:بجهئينانا مادا 140 کليلا چارەسەریا دەڤەرێن دەرڤەی ئیدارا هەرێمێ یە

سفيان يوسف:بجهئينانا مادا 140 کليلا چارەسەریا دەڤەرێن دەرڤەی ئیدارا هەرێمێ یە
سه‌ما
دهه‌ڤپه‌يڤينه‌كا تايبه‌ت دا ل گه‌ل سه‌ما،سفيان يوسف رێڤەبەرێ نڤیسینگەها شنگاڵ یا ده‌ڤه‌رێن کوردستانیێن دەرڤەی ئیدارا هەرێمێ باس ل جێبه‌جێكرنا مادا 140دكه‌ت و دبێژت: حکومەتا عیراقێ رێگرە ل هەمبەر جێبەجیکرنا ڤێ مادێ،بەڵگە ئەوە هیچ هەولدانەکا جددی ل سەر ئەردێ نه‌هاتيه‌ كرن.
سه‌ما: دەستەیا گشتی یا ده‌ڤه‌رێن دەرڤەی ئیدارا هەرێمێ كار ل سه‌ر مادا 140 دكه‌ت؟
سفيان يوسف:دەستەیا گشتی یا ده‌ڤه‌رێن کوردستانیێن دەرڤەی ئیدارا هەرێمێ و فەرمانگەها مە کو ئێکە ژ ده‌زگه‌هێن بسەرڤە هندەک ژ کار و ئەرکێ مە مادا 140 و ئێک ژ ئارمانجێن مە دیتنا ڕێيێن یاسایی و دایۆلۆکی ب هاریکارییا لژنا مادا 140 یا پەرلەمانێ کوردستانێ دا کو ئەڤ مادە بێتە جێبەجێکرن ژ لایێ حکومەتا عیراقێ ڤە،چنکو بریارا داويێ ل دەستێ حکومەتا عیراقێ دایە.
سه‌ما: شنگالێ چه‌ند گرنگيا خۆ هه‌يه‌ بۆ كوردستانێ؟
سفيان يوسف:شنگاڵ دەڤەرەکا کورد نشینە ئاخا کوردێن ڕەسەنە و خەلکێ وێ یی کورد پەروەرە ،لەورا چوو جاران نائێتە ڤەقەتاندن ژ کوردستانێ و شنگاڵ کلیلکا دەولەتبوونا کوردستانێ يه‌.

سه‌ما:حكومه‌تا عيراقێ رێگريێ ل بجهئينانا مادا 140 دكه‌ت؟
سفيان يوسف:حکومەتا عیراقێ ب پشتەڤانی و چەپل کوتانا هندەک ئالیێن دن رێگرە ل هەمبەر جێبەجیکرنا ڤێ مادێ، بەڵگە ئەوە کو هیچ هەولدانەکا جددی ل سەر ئەردێ نینە.
سه‌ما:بجهئینانا مادا 140 دێ بتە چارەسەری بۆ ڕەوشا شنگال؟
سفيان يوسف:مادا 140 ب دیتنا من کلیلکا چارەسەریا ڕەوشا شنگاڵ و دەڤەرێن کوردستانیێن دەرڤەی ئیدارا هەرێمێ یە،چنکو ئەڤ مادە گرنگیێ ب مافێ هەموو مللەتان ددەت نە بتنێ یێ کوردا و ئەوژی جۆرەکە ژ جۆرێن دادپه‌روهريا ئينتقالی گەلەک تشتا ب خۆڤە دگرت وەک قەرەبووکرن و زيانداريێ و ئێمناهییا دەڤەرێ و پاراستنا مافێ مرۆڤ وجێبەجێکرنا ڤێ ماددێ بەردەوامیێ ددەتە سەقامگێریا دەڤەرێ و ئاڤەدانکرنا ژێرخانێ،وەکو هەموو خەلکێ دەڤەرێ دزانن ئەڤە چەندین ڕێکكەفتن د ناڤبەرا حکومەتا عیراقێ و حکومەتا هەڕێما کوردستانێ دا هاتینە قەلەم دان لێ مخابن ئێک ڕێکەفتن و داخوازی هەتا نها نەهاتیە بجهئینان نە رێکەفتنا شنگاڵ و نە چەسپاندنا ئەڤا کو بسەرێ ئێزدیاندا هاتی ل 3 ی تەباخا 2014ێ ب جینۆساید بێتە ناسین ژ ئالیێ عیراقێ ڤە سەرەڕای ڤێ چەندێ پەرلەمانێ هەرێما کوردستانێ بریار دا کو ئەڤ کارەساتا بسەرێ ئێزدیاندا هاتی جینۆسایدە .
سه‌ما:ئەگەر مادا 140 هاتبا بجهئينان ئەڤ فه‌رمان بسەرێ خەلکێ شنگال نە دهات؟
سفيان يوسف: ئێک ژ ئەگەرێن جینۆسایدا ئێزدیان و فەرمانا شنگاڵێ ئەو بوو نە جێبەجێکرنا مادا 140 بوو،هەلبەت هەڤپەیمانێن ناڤدەولەتی و ئەنجوومەنا ئاسایيشا نەتەوه‌يێن ئێكگرتی هیچ قەبوول نەدکر ئەڤ جینۆساید ب سەرێ ئێزدياندا بێت ل ژێر بریارا ئەمریکا ل سالا 1992 بۆ پاراستنا ئەمنییەتا کوردستانێ.
سه‌ما:چ بێته‌ كرن بۆ شنگال؟
سفيان يوسف: دخوازين شنگاڵ ب فەرمی بکەفته‌ دبن پاراستنا هێزێن پێشمەرگەيى دا،داکو حکومەتا هەڕێمێ بتر پرۆژێن خزمەتگۆزاری ل ڤان دەڤەران ئەنجام بدەت و بۆ زانیاری 65 پرۆژێن خزمەتگۆزاری یێن جۆرا و جۆر ل سەر بوودجەیا حکومەتا هەڕێمێ سەر ب کەرتێن ( ئاڤێ و پەروەردە و تەندروستی) ل قەزا شنگاڵ و هەر سێ ناحیێن ب سەرڤە ( سنوونێ، گرعزێر و قەیرەوان) هاتن ئەنجامدان بەری سالا 2014ێ و بتریا وان ل ژێر جێبەجێکرندا بوون،لێ ب مخابنیڤە کارێ مە هاتە راوەستاندن ژبەر دەستەسەریا هێزێن نە شەرعی ل سەر وان پرۆژه‌يان و بکارئینانا وان بۆ مەرەمێن لەشکەری و بۆ نەموونە بنگەها تەندروستی یا خانەسۆرێ ب تەمامی مە ئەنجامدا،لێ ڤێ گاڤێ تێتە بکارئینان ژلایێ هێزێن نەشەرعی ڤە .