سه‌ما
مەسرور بارزانی، سەرۆکێ حکومەتا هەرێما کوردستانێ د بیرەوەرییا جینۆسایدا كوردێن ئێزدی ل شنگالێ دا، پەیامەك بەلاڤكر.
دەقێ پەیاما سەرۆكێ حكومەتێ:
ئەڤرۆ 10 سال ب سەر جینۆسایدكرنا خوشك و برایێن ئێزدی ل شنگالێ و دەوروبەران دەربازدبن، كو ژ ئەنجامێ هێرشێن دڕندانە یێن تیرۆرستێن داعش، ب هزاران كەس ژ ئاكنجییێن دەڤەرا شنگالێ، هاتنە كۆمكوژ كرن و دەهان هزارێن دی بێ سەروشوین و ئاوارەبوون.
هەرچەندە 10 سال ب سەر ڤێ تاوانێ دا دەربازدبن، لێ جهێ داخێ یە ئێش و ئازارێن خوشك و برایێن ئێزدی ب دوماهیك نەهاتینە و هێشتا ژمارەكا زور یا وان بێ سەروشوینن و ب ئەگەرێ خۆسەپاندنا میلیشیا و هێزێن چەكدار یێن دەرڤەی یاسایێ ل شنگالێ، ڕەوشا دەڤەرێ ئاسایی نەبوویە و ئاوارە نەشیاینە ڤەگەڕنە دەڤەرێن خۆ.
د ڤێ بیرەوەریێ دا، قۆربانیدانێن پێشمەرگێ كوردستانێ ب ڕێبەراتییا سەرۆك بارزانی، بلند د نرخینین و ب ڕێز ڤە لێ دنێڕین.
حكومەتا هەرێما كوردستانێ، دووپات دکەت کو بەردەوامە ل سەر بزاڤێن خۆ ل گەل حكومەتا فیدرال بۆ ئاسایكرنا ڕەوشا شنگالێ و دەوروبەرێن وێ و كاردكەت بۆ ئاڤەدانكرنا دەڤەرێ، داكو زەمینێ بۆ ڤەگەڕیانا سەربەرزانە یا خوشك و برایێن ئێزدی یێن ئاوارە بۆ جهێن وان بهێتە خۆشكرن. لەوما دۆپاتییێ ل جێبەجێكرنا ڕێككەفتناما شنگالێ وەك خۆ دكەین، ژبۆ هندێ ئارامی و سەقامگیری ڤەگەڕیتە دەڤەرێ و پاراستن و بڕێڤەبرنا دەڤەرێ ژی ب خەلكێ ڕەسەنێ شنگالێ بهێتەدان.
سەرێ رێز و نەوازەشێ بۆ شەهید و قۆربانییێن كۆمكوژییا شنگالێ و هەمی شەهیدێن کوردستانێ دچەمینین.