سه‌ما
په‌يڤدارێ حکوومەتا هەرێما کوردستانێ کۆمەکا پرۆژەيان بۆ هەڵەبجە راگەهاند و گۆت کو پارە بۆ پرۆژان هاتیە تەرخانکرن، هەروەسا دبێژیت: لسەر پرسا مووچە، ڤێ هەفتیێ کۆمەکا جڤینێن گرنگ د ئاستێ بلند دا دێ هێنە کرن.
پێشەوا هەورامانی،په‌يڤدارێ حکوومەتا هەرێما کوردستانێ، د پرێسكۆنفرانسه‌كێ رۆژنامەڤانی دا راگەهاند، ئيرۆ بۆ راگەهاندنا کۆمەکا پرۆژە سەرەدانا هەڵەبجە کریە و دگەل هەردوو جێگرێن پارێزگەها هەڵەبجە كۆمبووينه و دانوستاندن ل سەر کریە.
هەروەسا گۆت: سەرۆکوەزیر مەسرور بارزانی، بخۆ چاڤدێریا پرۆژێن هەڵەبجە دکەت، و دخوازت خال ب خال داخوازیێن هەڵەبجە بهێنە جێبەجێکرن. دبێژیت ژی: ئاڤاهیەکێ نوودەم بۆ رێڤەبەریا پۆلیسێ هەڵەبجە دێ ئێتە چێکرن، کو ب زووترین دەم دێ کەفتە قۆناغا جێبەجێکرنێ، هەروەسا ئاڤاهیەکێ نوو ژی بۆ رێڤەبەریا چاندنێ دێ ئێتە چێکرن.
پێشەوا هەورامانی زەلال کر، کو 250 ملیۆن دینار بۆ نۆژەنکرنا جادا گشتی یا هەڵەبجە هاتیە تەرخانکرن، هەروەسا نێزیکی 100 ملیۆن دینار بۆ دوو پرۆژێن گەشتیاری ل بیارە، ل سەر بریارا نڤیسینگەها سەرۆکوەزیران هاتیە تەرخانکرن، رەزامەندی ل سەر 114 ملیۆن دیناران، بۆ رێڤەبەریا تەندروستیا هەڵەبجە هاتیە دان کو بۆ بەرەنگاربوونا نەخۆشیا کۆلێرایە.
په‌يڤدارێ حکوومەتا هەرێمێ ئاماژە ب وێ ژی دا “دەڤەرا پێشەسازی یا هەڵەبجە کار ل سەر هاتیە کرن ب زووترین دەم دێ کەفتە قۆناغا جێبەجێکرنێ دا، ژبلی وێ دەستەیا وەبەرهێنانێ لێبۆرینا باجان بۆ هەموو وان پرۆژان دەرکریە کو تایبەتن ب پارێزگەها هەڵەبجە. ئەو پرۆژە ژی دێ کاریگەری ل سەر دەرفەتێن کاری یێن دەڤەرێ هەبت”.
دبێژیت ژی: حکوومەتا هەرێما کوردستانێ د دەمێ داهاتی دا کۆمەکا پرۆژان ل خورمال دێ راگەهینت، کو دخوازت خورمال و هەورامان ژی ببنە ناڤەندەکێ گرنگێ گەشتیاری ل دەڤەرێ، ئەڤە ژی ئەو پرۆژە بوون کو هەموو پارە بۆ وان هاتیە دابینکرن.
دەربارەی مووچەى ژی هەورامانی گۆت: ئەگەرێ نەهاتنا مووچە، ئاستەنگکرنەکا سیاسی یە و برسیکرنا خەلکێ هەرێما کوردستانێ یە، چ پاسا و د دەستێ وان دا نینە کو مووچەیا خەلکێ هەرێما کوردستانێ بریە، ئەڤە ژی دژی دەستوورا عیراقێ و دادگەها فیدرال ە؛ چونکی دادگەها فیدرال گۆت نابت مووچە تێکەلی سیاسەتێ بێتە کرن، هەموو داخوازیێن بەغدا ژی هاتنە جێبەجێکرن.
هەروەسا گۆت: د ڤێ هەفتیێ دا سەرۆکوەزیر کۆمەکا جڤینێن گرنگ د ئاستێ بلند دا، ل سەر ڤێ پرسێ دێ کەت، لەوما دێ زەلال بت کا بۆچی مووچە نەشاندنە. دبێژیت ژی: ئێک ژ پاساوێن وان ئەوە کا بۆچی فەرمانبەرێن خواندنا کوردی ل کەرکووکێ مووچەیێ وان ژ هەرێما کوردستانێ دئێتە دان؟ کو بەری نۆکە رێککەفتن هەبوو ئەو فەرمانبەر بێنە ڤەگوهاستن بۆ سەر وەزارەتا پەروەردەیا عیراقێ، وان رێککەفتن جێبەجێ نەکریە.
دووپاتكر، ئيرۆ 36 سال بسەر ئەنفالا به‌هدینان را دەرباز دبن، ئەوێن کو چاڤساغ و پێشرەوێن لەشکەرێ بەعس بوون بۆ ئەنفالێ، هەر ئيرۆ د ناڤ بەرگ و قالبەکێ دی دا چاڤساغ و پێشرەوێن وان دەنگان ە کو د ناڤ حکوومەتا فیدرال دا دخوازن خەلکێ هەرێما کوردستانێ برسی بکەن، لەوما جاش هەر جاش ە لێ سەردەمێ وێ گوهۆریە.