ناڤەندا نووچەیان – سەما
پەرلەمانتارێ خۆلا پێنجێ یا پەرلەمانێ عێراقێ، مهحما خهلیل، هۆشداری دا ژ مەترسییا بەردەوامبوونا گۆتارێن کەربوکينێ و هاندانا ئۆلی و ڕاگەهاندنێ ل وەلاتى. دوپات کر کو مەزنترین مەترسی یا ئیرۆ ل سەر عێراقێ هەی ژ پاشماييیێن تیرۆرا چەکدار دەرباز دبت و دگەهتە وان هزر و ژینگەها هزری یا ئهو بەرهەم ئینای.
پەرلەمانتارێ ئێزدی د داخویانییەکا ڕۆژنامەڤانی دا ڕۆهن کر کو جینۆسایدا ب سهرێ ئێزدییان دا هاتی، ب داویهاتنا دەستههلاتا مەیدانی یا ڕێکخراوا “داعش” ل سەر ئەردی ب داوی نەهاتییە، بەلکو هێش ب شێوازێن دی بەردەوامە. ئەو ژی ب ڕێیا بەهانەئینان و بچووککرنا تاوانان، یان نیشاندانا گوهۆڕینا ناسنامەیا ئۆلی و ڕهوشهنبیری یا قوربانییان وەکی “دەستکەفت”. ناڤبری ئاماژە ب وێ چەندێ ژی دا یا ڤێ داوییێ هاتیە بەحس کرن ل دۆر چاوانیا سەرەدەریکرنێ ل گەل کەیسا ئێک ژ کچێن ڕزگاربوویى يێن ئێزدی پشتی چهندين سالێن ئێخسیرکرنێ.
مهحما خهلیل زێدەتر گۆت: ” ئەوا داعشێ تاوانەک كرى يا دەستنیشانکری بوو ب دەمەکی، بەلێ ئاخفتنێن کەربوکينێ گەلەک مەترسیدارترن؛ چنکو د هزر و هشا جڤاکی دا دچن و وێ ژینگەهێ سەر ژ نوو بەرهەم دئیننەڤە یا کو ڕێ دایی ب ڕوودانا تاوانێ. ئەڤە ژی گەفێ ل پاشەڕۆژا پێکڤەژیانێ دکەت و ههبوونا پێکهاتەیان دکەتە ئارمانج.”
ئاماژه ب وێ چهندێ دا، ئارمانجا داوییێ یا ڤان ئاخفتنان، ڤالاكرنا عێراقێ یە ژ هەمەرەنگییا ئۆلی و نەتەوەیی، ئینانا فشارێ ل سەر پێکهاتەیان بۆ کۆچکرنێ، کو ئەڤە ب دەق پێشێلکرنا دەستوورێ عێراقێ و بهایێن هەڤوەلاتینیێ و پێگێرییێن نێڤدەولەتی یێن پەیوەندیدار ب پاراستنا قوربانییێن جینۆسایدێ یە. هەروەسا دا زانین کو بەردەوامبوونا ڤێ هاندان و جوداکارییێ چ ب ڕێیا پرۆپاگندهيێ، بەهانەئینانێ، یان بێدەنگییێ بت” ئەگەرێ سەرەکی یە بۆ مانا دۆسیەیا جینۆسایدا ئێزدییان و کێمبوونا مافێن وان هەتا ئیرۆ.
داواکاری بۆ ڕێکارێن توند و ستراتیژییەکا نشتیمانی
د داویا داخویانییا خوە دا، پەرلەمانتار محما خلیل علی ئاغا داواکارییێن بلهز ڕابهرى ڤان ئالييان کرن:
حکومەتا عیراقێ و ئهنجومهنێ نوونەران
دەستهەلاتا دادوەری
دەستەكا ڕاگەهاندن و پەیوەندییان
کۆمسیۆنا مافێن مروڤی
داخواز ژ وان کر کو ڕێکارێن توند بگرنە بەر بۆ تاوانبارکرن و سزادانا هەر کەسەکێ کو پروپاگەندهيێ بۆ ئاخفتنێن کەربوکينێ دکەت یان بەهانەیان بۆ تاوانێن جینۆسایدێ دئینیت. هەروەسا جەخت ل سەر ڕاگەهاندنا ستراتیژییەکا نشتیمانی کر بۆ بەرهنگاربوونا توندڕەوی و کەربوکينێ و مسۆگەرکرنا نەئێخستنا کەنالێن ڕاگەهاندنێ د خزمەتا بریندارکرنا کەرامەتا قوربانییان دا.
مهحما خهليل ئاخفتنا خوە ب وێ چەندێ ب داوی ئینا کو پاراستنا پێکهاتەیێ ئێزدی ب تنێ ب ساخکرنا یاداشتێن سالانە چێ نابت، بەلکو ب نەهێلانا هزرا تیرۆریستی ژ ڕەهـ و ڕیشالان و هشککرنا ژێدەرێن کەربوکينێ چێ دبت. دوپات ژی کر کو عێراق دێ ئارام مینت ب تنێ دەما کو ههموو ئۆل و نەتەوەیێن وێ يێن جودا ئارام بن.