سەما
ڕێكخستيه‌كا مافێ مرۆڤى ل شنگالێ رۆنكرنه‌ك ل دۆر ئه‌وان هه‌ستيێن ژلايێ ژنه‌كێ ڤه، ل کۆمەلگەها گرزەرک ل باشوورێ شنگالێ هاتينه ديتن به‌لاڤكر.
ل ڕۆژا پێنج شه‌مبوويێ 22ى ته‌باخا 2024ێ، گرته ڤيديۆكا ژنه‌كا ئێزدى كو هنده‌ك هه‌ستيكان ل ئێك ژ جهێن ل کۆمەلگەها گرزەرک دبينت ل تۆرێن جڤاكى دا به‌لاڤ بوويه و دبێژت، ئه‌و هه‌ستى يێن قوربانيێن ئێزدى نه ل سه‌ر ده‌ستێ تيرۆرستێن داعشێ.
ل هه‌مبه‌ر به‌لاڤبوونا ڤێ گرته ڤيديۆيێ،خەیری عەلی، بەرپرسێ رێکخستيا پتریکۆر يا مافێ مرۆڤى ئۆفيسا شنگالێ بۆ سەما گۆت: ئەو هەستیێن ژلايێ ژنه‌كێ ڤه ل کۆمەلگەها گرزەرک هاتینە دیتن، به‌رى هەیڤەکێ مە وێنەیێن وان بۆ جهێن تايبه‌تمه‌ند و پسپۆر هنارتبوون.
ئاشكراكر: پشتى ڤه‌كۆلين ل دۆر ئه‌وان هەستیان هاتيه كرن دياربوو یێن مرۆڤان نينن، به‌لكو يێن گیانەوەران ل وى جهى بوون.
ل دەما هێرشا ڕێكخراوا داعش يا تيرۆرستى بۆ سەر شنگالێ ل 3ى ته‌باخا 2014ێ، ب سەدان وه‌لاتیێن ئێزدى دگۆرێن بکۆم دا هاتنه گوله‌بارانكرن.
تا نۆكه ب دەهان گۆڕێن بکۆم ل جهێن جودا جودا يێن شنگالێ هاتینە دیتن و هنده‌ك ژێ هاتينه هه‌لدان، رووفاتێن پتريا قوربانيان پشتى پشكنينا دى ئێن ئه‌ى بۆ هاتيه كرن ژلايێ كه‌سوكارێن وان ڤه هاتنه ڕاده‌ستكرن و ڤه‌شارتن .
ل ڕێككه‌فتى 13/11/2015ێ، ب سه‌رپه‌رشتيا راسته‌وخۆيا سه‌رۆك بارزانى دئۆپه‌راسيۆنه‌كێ دا شنگال ل سه‌ر ده‌ستێ هێزێن پێشمه‌رگه‌ى ژ ده‌ستێن تيرۆرستێن داعشێ هاته رزگاركرن.