میر تەحسین بەگ کییە؟
میر تەحسین سەعید عەلی بەگ ل رۆژا 15ی تەباخا 1933ێ ل دەڤەرا باعەدرێ سەر ب قەزا شێخان ڤه هاتیە دنیایێ، ل هاڤینا سالا 1944ێ، دەمێ میر تەحسین بەگ تەمەنێ وی دگه‌هته نێزیکی ١١ سالان و ب سەدەما کۆچا داویا بابێ وی، ژلایێ دای مه‌یانا ده‌یكا وی ڤه بۆ پۆستێ میرێ کوردێن ئێزدی هاتە هەلبژارتن، ژ وی دەمی ڤە هه‌تا رۆژا وه‌غه‌ركرنا وی بۆ ماوێ 75 سالان میراتی ل ئێزدیێن کوردستانێ و جیهانێ كریه.
تێ زانین د سالێن زارۆکینیا میر تەحسین بەگ دا، مەیان خاتوونا دایکا وی سەرپەرشتیا کارێن وی دکر هەتا تەمەنێ وی گەهشتیە 18 سالان.
ژ تەمەنێ 18 سالیێ ڤە، میر تەحسین دەست ب جێبەجێکرنا ئەرکێن خۆ کر وەک میرێ هەمی کوردێن ئێزدی، ژ سەرۆکاتیکرنا کاروبارێن دنیایی یێن کوردێن ئێزدی هەتا نوینەراتیکرنا وان د هەموو چڤین و کۆمبوونان و پەیوەندیێن وان دگەل وەلاتان و پێکهاتێن دیدا.
ل دووڤ بنەمایێن باوەریا ئێزدی، میرێ کوردێن ئێزدی هەردوو دەستهەلاتێن دنیایی و ئایینی د دەستێن وی دانە، ژلایێ ئاینی ڤە میرێ کوردێن ئێزدی سەرۆکاتیا ئەنجومەنا روحانی یا ئێزدیان دکەت.
میر تەحسین بەگ ل دەستپێکا سالا 1970ێ بەشداری د بزاڤا رزگاریخوازا کوردی دا کر، پشتی نسکۆیا ١٩٧٥ێ ئاوارەی ئیرانێ بوو، پاشی بەرەڤ وەلاتێ بەریتانیا چوو و ژ سالا 1976ێ هەتا سالا 1981ێ ل وی وەلاتی ما.
پشتی سالا 1981ێ، میر تەحسین ژ لایێ حکومەتا بەعسڤە لێبورین بۆ هاتە دەرکرن و ڤەگەریا عیراقێ.
ل رۆژا 28-1-2019 میر تەحسین بەگ ل ئێک ژ نەخۆشخانێن باژارێ هانۆڤەرێ یێ ئەلمانیا د تەمەنێ 86 سالیێ دا کۆچا داویێ کر.
میر تەحسین بەگ وەسیەت کربو وکو د ناڤ باخچێ مالا خۆدا بێتە ڤەشارتن.
ل رۆژا دوشەمبوويێ 4-2-2019، تەرمێ میر تەحسین بەگ میرێ ئێزدیێن کوردستانێ و جیهانێ ب فڕۆکەکا تایبەت ژ ئەلمانیا گەهشتە فڕۆکخانا نێڤدەولەتی یا هەولێرێ و د رێ و رەسمەکێدا و ب ئامادەبوونا سەرۆکوەزیرێ هەرێما کوردستانێ و بەرپرسێن دی یێن حزبی و حکومی پێشوازی لێ هاتە کرن و ل رۆژا 5/2/2019 ێ تەرمێ ميرى ل كۆچكا وی ل شێخان هاتە ڤەشارتن.