سه‌ما
پشتی كو د چه‌ند ڕۆژێن بۆری دا له‌شكه‌رێ ئۆكراینایێ هێریش كره سه‌ر كۆرسكا سنۆری یا روسیایێ و پێشڤه‌چوو، د به‌رانبه‌ر دا مۆسكۆ ب ئێریش بۆ سه‌ر ژێرخانا سیڤیل یا ئۆكراینایێ به‌رسڤ دا.
ئيرۆ 31ى ته‌باخا 2024ێ، ئه‌میندارێ گشتی یێ ناتۆ ڕاگه‌هاند، هێرشێن له‌شكه‌رێ ئۆكراینایێ بۆ سه‌ر كۆرسك ژ لایێ یاسایا نێڤده‌وله‌تی ڤه ره‌وایه، لێ ناتۆ ل پشت هێریشان نه‌بوویه.
مالپه‌را “عه‌ره‌بیه” ئه‌ڤرۆ شه‌مبی 31ێ ئابێ به‌لاڤ كریه، پشتی هێریشێن له‌شكه‌رێ ئۆكراینایێ بۆ سه‌ر كۆرسكا د ناڤ خاكێ روسیایێ دا و گرتنا ده‌ڤه‌ره‌كا فره‌ه یا ناڤچه‌یێ، ینس ستۆلتنبرگ ئه‌میندارێ گشتی یێ رێكخراوا ناتۆ د هه‌ڤپه‌یڤینه‌كێ دگه‌ل رۆژناما “فێلت ئێم زۆنتاج” یا ئه‌لمانی كو ئه‌ڤرۆ به‌لاڤ بوویه، ئێریشا ئۆكراینایێ بۆ سه‌ر كۆرسك ب ره‌وا زانیه.
ینس ستۆلتنبرگ ڕاگه‌هاند، ئه‌و هێریشا له‌شكه‌رێ ئۆكراینایێ بۆ سه‌ر كۆرسك كری، به‌رگری ژ وه‌لاتێ خۆ بوویه و بۆ وێ ژی پێشێلكرنا یاسایا نێڤده‌وله‌تی نه‌كریه. چنكو بۆ به‌رگریكرن ژ وه‌لاتێ خۆ، یاسایێن نێڤده‌وله‌تی به‌حس ژ وێ نه‌كریه كو له‌شكه‌ر ل سه‌ر سنۆر بهێته راگرتن، به‌لكو ئه‌وا هاتیه كرن به‌رگریكرن ژ خۆ بوویه.
ینس ستۆلتنبرگ ئه‌و ژی گۆت: رێكخراوا ناتۆ ب تو شێوه‌ی بۆ وێ هێریشێ نه‌هاتیه ئاگه‌هداركرن و ده‌ست ژی د ئێریشێ دا نه‌بوویه.
ئه‌و باوه‌ر دكه‌ت كو كییڤ ریسك كریه د وێ ئێریشا كری دا و چوویه د ناڤ خاكێ روسیایێ دا، لێ ئه‌و په‌یوه‌ندی ب خۆ ڤه هه‌یه و خۆ دزانیت چاوا ئیداره‌یا شه‌ری دكه‌ت.
پاشی ژی گۆت: ڤۆلۆدیمێر زیلینسكی سه‌رۆكێ ئۆكراینایێ، ئه‌و یه‌ك روون كر كو دخوازن ناڤچه‌یه‌كا ڤه‌قه‌تیای د ناڤبه‌را خۆ و له‌شكه‌رێ روسیایێ دا هه‌بیت دا رێ ل ئێریشێن روسیایێ ل سنۆر بگرن، لێ هه‌می ئه‌ڤ په‌یوه‌ندی ب ناتۆ ڤه نینن.
شه‌رێ روسیایێ ل دژی ئۆكراینایێ كو ل 24ێ شوباتا 2022 ده‌ست پێ كر، ب ئه‌گه‌رێ وێ هزاران كوژتی و بریندار ل هه‌ردوو لایان كه‌فتنه، ب ئه‌گه‌رێ وێ ملیۆنان ئۆكراینی ژی ئاواره بوون و جهێن خۆ به‌ره‌ڤ وه‌لاتێن ئه‌وروپا هێلان.